«Նախ` «Կալիբր» գարեջրատուն քեֆ անելու տրամադրությամբ չէինք գնացել, այնտեղ հանդիպում պետք է ունենայի»,- «Pastinfo.am»-ի հետ զրույցում ասել է քաղաքագետ Սուրեն Սուրենյանցը՝ անդրադառնալով հունվարի 26-ին տեղի ունեցած միջադեպին:
«Եթե ես կամ ուղեկիցս այդ գարեջրատանը հասարակական կարգը խախտած լինեինք, ապա գարեջրատան կողմից հրավիրված կարմիր բերետավորները մեզ բերման կենթարկեին, սակայն մեզ հետ զրույցում վերջիններս համոզվեցին, որ մեր արարքի մեջ որևէ արտառոց բան չկա»,- ասել է Սուրենյանցը՝ հավելելով. «ի՞նչ է պետք է ամեն բան վերջանա «Հարսնաքար» ռեստորանային համալիրում տեղի ունեցածի տարբերակո՞վ, որ ի վերջո հասկանան, որ Հայաստանում խնդիր կա սպասարկման որակի հետ կապված:
Ի դեպ Սուրենյանցն ակնհայտորեն վրդովված է եղել ԶԼՄ-ների արձագանքից:
Սուրենյանցի խոսքով այնպիսի տպավորություն է ստեղծվում, որ եթե ուղղակի մարդուն ծեծել են ու վերջինս չի ստացել լուրջ վնասվածքներ, ապա կարող են հավասար դիտանկյունից ներկայացնել խնդիրը. «եթե վերջանում է «Հարսնաքար» ռեստորանային համալիրում տեղի ունեցած ողբերգական միջադեպով, ապա տուժողը հերոսացվում է, ծեծողները` մեղադրվում: Ես ուզում եմ ասել, որ նման ամենաթողությունն է ծնում այսպիսի դեպքեր»:
Եթե կա վեճ, ապա քաղաքացիաիրավական կամ բանավոր համաձայնությունների դաշտում կարող է լուծվել, նման ագրեսիան և չհիմնավորված հավակնությունները հասկանալի չեն,- նշել է Սուրենյանցն ու, մանրամասնելով տեղի ունեցած միջադեպը, հավելելով. «երբ բերեցին հաշիվը՝ շատ կոպիտ արտահայտվելով ասացին. հաշիվը փակեք ու հեռացեք, իսկ մենք սկզբունքորեն հաշիվը չփակեցինք, այդտեղ ո՛չ գումարի խնդիր կար և ո՛չ էլ անսթափ լինելու»:
Հիշեցնենք, որ հունվարի 26-ին Սուրենյանցը վիճել է «Կալիբր» սրճարանի տնօրենի հետ, ինչը հետո շարունակվել է «Արևելյան Խոհանոց»-ում` վերաճելով ծեծկռտուքի:
Տեղի ունեցածը Սուրենյանցը որակել է Հայաստանում սպասարկման ոլորտի մակարդակի ցածր լինելով՝ «այս միջադեպը քաղաքական կամ այլ գնահատականի չեմ ուզում արժանացնել, միայն ինձ մտահոգում է, թե նմանատիպ քանի դեպք կարող է տեղի ունենալ օրվա ընթացքում»:
Ըստ Սուրենյանցի միջադեպը իրեն առիթ է տվել մտորելու իր վարքագծի մասին և մի փոքր ավելի ուշադիր հետևելու այն ինտրիգներին, որ գուցեև հյուսվում են իր շուրջ: «Ոմանց կողմից քաղաքական դիվիդենտներ շահելու ու նաև իմ անվան շուրջ կերպար ստեղծելու հարց կա, դա միանշանակ է»,- նշել է Սուրենյանցը՝ ավելացնելով, որ չնայած ինքն այս գործում պոտենցիալ տուժողի կարգավիճակում է, այնուամենայնիվ չի ցանկանա, որ այն քրեական հեռանկարով գործի վերածվի: Իսկ եթե «Կալիբր» գարեջրատան սեփականատերը ափսոսանք հայտնի կամ ներողություն խնդրի, ապա Սուրենյանցը պատրաստ է ոստիկանությանը խնդրել, որ շատ ավելի մեղմ վերաբերվեն գարեջրատան տնօրեն՝ ոմն Հարությունի հետ:
Քաղաքագետը նաեւ զգուշացնում է. «եթե ինձ հարվածողին կամ նրա հետևում կանգնած մարդուն կթվա, որ բարձր տանիք խառնելով կարող է ազդել իմ և իմ գործողությունների վրա, ապա չարաչար սխալվում է, և եթե փորձեն խաղի կանոն թելադրել, ազդել նաև իրավապահ մարմինների գործողությունների վրա, ապա կարժանանան ադեկվատ պատասխանի»: Իսկ պահի ազդեցության տակ թույլ տրվող սխալները, Սուրենյանցի խոսքով, պետք է հնարավորություն տալ ուղղվելու:
Լուսանկարը՝ PanARMENIAN Photo-ի
