Ծագումով վրացի ռուս հայտնի երգիչ Սոսո Պավլիաշվիլին «աբսուրդ» է անվանել վրացական ԶԼՄ-ներում շրջանառվող այն տեղեկությունը, թե ինքը առնչություն ունի իր բիզնես-գործընկերոջ՝ Ավտո Ադուաշվիլիի սպանությանը՝ հայտնում է vestikavkaza.ru-ն:
Համապատասխան տեղեկությունն այսօր տարածել է «Ռուսթավի-2» հեռուստաընկերությունը:
Երգչի մանկության ընկեր, գործընկեր Ավտոն սպանվել էր Թբիլիսիում՝ սեփական ավտոմեքենայում, 2012թ. նոյեմբերի 23-ին:
Օրերս վրացական «Գուրիա նյուզ» թերթում հայտնվել էր Էկա Ալփաձեի հոդվածը, որտեղ հեղինակը պնդում էր, թե սպանված գործարարի ընտանիքի անդամներից մեկը այդ մահվան մեջ կասկածում է Սոսո Պավլիաշվիլիին:
Նյութում նշվում էր նաև, որ դրա հետ կապված՝ 2012թ. դեկտեմբերի 12-ին ձերբակալվել էին Սոսո Պավլիաշվիլիի քրոջ ամուսինը՝ Վախթանգ Չխապելիան, ու ևս 3 մարդ:
Սակայն Վրաստանի ՆԳՆ-ն դեռ տեղեկություն չի տարածել ոչ ձերբակալվածների, ոչ սպանության դրդապատճառների մասին:
