Կոտայքի ՀՀԿ-ական մարզպետ Կովալենկո Շահգալդյանը «Առաջին լրատվական»-ի հետ հեռախոսազրույցում բավականին ուշագրավ հայտարարություն արեց՝ մեկնաբանելով նախագահական ընտրությունների նկատմամբ հասարակության մեջ առկա անտարբերության մասին դիտարկումը: Հիշեցնենք, որ այդ անտարբերության պատճառներից մեկն էլ այն է, որ ոչ իշխանական 3 ուժեր՝ ԲՀԿ-ն, ՀԱԿ-ը և ՀՅԴ-ն նախագահի թեկնածուներ չեն առաջադրել և հայտարարել են, թե որևէ այլ թեկնածուի չեն սատարելու: Եվ այս անգամ ՀՀԿ-ականներն իրենց թեկնածու Սերժ Սարգսյանի համար ձայներ ապահովելու հետ մեկտեղ՝ ընդհանրապես ընտրություններին մասնակցություն ապահովելու խնդիր ունեն:
«Այդ դեպքում դուք պետք է թվաբանություն անեք: ԲՀԿ-ն, Կոնգրեսը, Դաշնակցությունը հայտարարել են, որ թեկնածու չեն ունենալու: Գումարեք ԱԺ ընտրությունների նրանց ընտրազանգվածը: Ուրեմն այս երկրում ընտրություն չի՞ լինի, և միայն ՀՀԿ-ի՞ ընտրողները պետք է գնան… Եթե ձեր տրամաբանությամբ առաջնորդվենք, ՀՀ-ում մոտ 1 մլն մարդ պիտի ընտրություններին չմասնակցի: ԲՀԿ-ից մենք ունենք համախոհներ և աշխատանքային, և քաղաքական կարգով: Իհարկե, կան ԲՀԿ-ականներ, որոնք մեզ հետ համակարծիք են: Այս ընտրությունները մի՛ կուսակցականացրեք: Սա երկրի նախագահի ընտրություն է»,- ասաց մարզպետը:
Մարզպետը կարծես ընդունեց, որ այս երեք ուժերը միասին ունեն 1 մլն ընտրող: Այդ դեպքում ՀՀԿ-ին բաժին է ընկնում մոտ կես մլն ընտրող: Մինչդեռ անցած տարվա խորհրդարանական ընտրություններին այդ կուսակցությունը ստացել էր մոտ 700 հազար ձայն: Եվ մարզպետը կարծես թե ակամա ու անուղղակիորեն ընդունեց, որ ընտրությունները կեղծվել են հօգուտ ՀՀԿ-ի:
Կ. Շահգալդյանը համոզված է՝ այս ընտրությունների նկատմամբ հասարակական հետաքրքրությունը կավելանա ընտրություններին նախորդող վերջին տասնօրյակում: Հիշեցնենք, որ ի տարբերություն ՀՀ մյուս մարզերի՝ Կոտայքում ՀՀԿ-ի հետ միասին մեծ ազդեցություն և ուժեղ կառույցներ ունի նաև «Բարգավաճ Հայաստան» կուսակցությունը: Կոտայքի համայնքների կեսից ավելի համայնքապետեր այդ կուսակցության անդամ են: Իսկ ԲՀԿ-ն մոտ 2 ամիս առաջ հայտարարել է, որ նախագահական ընտրություններին թեկնածու չի առաջադրելու և որևէ թեկնածուի չի սատարելու: Այդ դեպքում ՀՀԿ-ն այդ մարզում իր թեկնածուի համար հաղթանակ ապահովելու գործում արդյոք խնդիր չի՞ ունենա:
– Պարոն Շահգալդյան, միգուցե ընտրություններին թեկնածուներ չունեցող ԲՀԿ-ի, ՀԱԿ-ի և ՀՅԴ-ի ընտրողներն ու համակիրները հարկ չհամարեն մասնակցել ընտրություններին, իսկ Ձեր ղեկավարած մարզում հատկապես ԲՀԿ-ն ունի ուժեղ ներկայացվածություն:
– Ես մի առիթով ասել եմ, որ նախագահական ընտրություններին կուսակցական պատկանելությունը շատ քիչ դերակատարություն ունի կամ ընդհանրապես չունի: Եթե ձեր տրամաբանությամբ առաջնորդվենք, ուրեմն ԲՀԿ-ի 450 հազար ընտրողներն ընդհանրապես պետք է ընտրություններին չմասնակցեն: Բայց այսօր ընտրում ենք երկրի նախագահ և ոչ թե կուսակցություն: Ամեն մի ընտրող, մեր երկրի յուրաքանչյուր քաղաքացի իր պարտքն է համարում մասնակցել ընտրություններին: Եվ կարծում եմ, որ ԲՀԿ-ի ընտրազանգվածի մեծ մասը նախապատվությունը կտա ՀՀ նախագահին՝ մեր թեկնածուին:
– Ինչո՞ւ եք այդպես կարծում:
– Իմ անձնական շփումների, հարաբերությունների արդյունքում եմ հասկացել:
– Բայց չէ՞ որ 2 ամիս առաջ ԲՀԿ-ն հայտարարեց, որ թեկնածու չի առաջադրելու և որևէ այլ թեկնածուի չի սատարելու: Այս պարագայում ԲՀԿ-ի ընտրողների մեծ մասն ինչո՞ւ պետք է շահագրգռված լինի ընտրություններին գնալ ու հատկապես ձեր թեկնածուին ընտրել:
– Այդ դեպքում դուք պետք է թվաբանություն անեք: ԲՀԿ-ն, Կոնգրեսը, Դաշնակցությունը հայտարարել են, որ թեկնածու չեն ունենալու: Գումարեք ԱԺ ընտրությունների նրանց ընտրազանգվածը, ուրեմն այս երկրում ընտրություն չի՞ լինի, և միայն ՀՀԿ-ի՞ ընտրողները պետք է գնան:
– Այդ կուսակցությունների ընտրողների մի մասը կարող է գնալ և ուրիշին ընտրել, մի մասը կարող է ընդհանրապես չգնալ:
– Դրա համար էլ դուք շատ շփումներ ունեցեք մարդկանց հետ և տեսեք, որ նրանք նախագահական ընտրություններին կուսակցական պատկանելությանն այդքան էլ ուշադրություն չեն դարձնում: Նրանք առավելությունը տալիս են անձին և անձի ծրագրերին, նախընտրական խոստումներին:
– Ընտրողներն ինչո՞ւ պետք է նախապատվությունը տան ու հավատան Ս. Սարգսյանին, եթե նրա նախագահության տարիներին աղքատության ցուցանիշը կրկնակի աճել է, արտագաղթի տեմպերն էլ՝ ավելացել:
– Որովհետև Ս. Սարգսյանն իր աշխատանքային տարիներին՝ սկսած 1988-ից մինչև այսօր, ժողովրդի աչքի առջև է, նրա կենսագրությունը ձևավորվել է մեր ժողովրդի աչքի առջև, մեր նորանկախ երկրի պատմության ընթացքում: Բոլորս էլ գիտենք և պարոն Սարգսյանի դրական կողմերը, և աշխատանքը: Ինչո՞ւ չպիտի ընտրեն:
– Բացասական կողմերը չգիտե՞ն:
– Չկա մարդ, որ բացասական կողմ չունենա: Ամեն ինչ համեմատության մեջ է: Եթե բացասականն ու դրականը դնում ես, բավականին մեծ խզում է առաջանում՝ դրականը շատ մեծ է բացասականի նկատմամբ:
– Կրկնակի աճած աղքատությունն ու օրեցօր ավելացող արտագաղթի կողքին դրական ի՞նչ ցուցանիշ կարող եք նշել:
– Ի՞նչ է, դուք ուզում եք, որ ես ամբողջովին վերլուծե՞մ 20-25 տարիների ընթացքը: Ես դրա համար ժամանակ չունեմ:
– Ձեր մարզում Գագիկ Ծառուկյանի ազդեցությունը մեծ է: Նրա հետ քննարկե՞լ եք ընտրությունների հետ կապված հարցեր: Ասում են, թե նա խոստացել է Աբովյան քաղաքում Ս. Սարգսյանի համար 90 տոկոս ձայն ապահովել:
– Կարծում եմ, որ քննարկելու անհրաժեշտություն չկա: Գ. Ծառուկյանն իր քաղաքական դիրքորոշումը՝ ի լուր մեր ժողովրդի, հայտարարել է: Ինչ իմաստ ունի քննարկումներ անել մի անձի հետ, որը հայտարարել է, թե այս ընտրություններին ինքը և իր համախոհները չեն աջակցելու:
