Երևանում տուրիզմի զարգացման ուղղությամբ անցած տարի սկսված աշխատանքներն այս տարի կշարունակվեն տարբեր ուղղություններով: Ներկայացնելով կատարված աշխատանքները՝ այսօր ասուլիսում Երևանի քաղաքապետարանի մշակույթի վարչության տուրիզմի բաժնի պետ Մարիա Բարաղամյանը դրանցից առանձնացրեց «Սիթի տուր» նախագիծը, Երևանի բրենդի մրցույթը, որը հայտարարվել է անցած տարեվերջին: Մրցույթի ժամկետը երկարացվել է մինչև մարտի կեսը: Նախատեսվում է ընտրել Երևանի պատմաշակութային որևէ հուշակոթող, որը կառնա Երևանի բրենդը:
Ըստ Մ. Բարաղամյանի, անցած տարի մոտ 600 հազ. զբոսաշրջիկ է այցելել Երևան, և նրանցից շատերն առաջին անգամ են եկել մեր մայրաքաղաք: Զբոսաշրջիկներին հետաքրքում է հիմնականում հին ու նոր Երևանը, թանգարանները, հատկապես Էրեբունու թանգարանը, հուշակոթողները և այլն:
Բանախոսը հայտնեց, որ անցած տարվա վերջին տպագրության է հանձնվել «Պատուհան դեպի Երևան» եռաչափ գիրքը, որը հնարավորություն կտա զբոսաշրջիկներին ավելի լավ պատկերացում կազմելու մեր քաղաքի մասին:
Մ. Բարաղամյանը նաև նշեց, որ զբոսաշրջիկներին Երևանում գրավում են հատկապես միջոցառումները՝ Էրեբունի-Երևան տոնակատարությունը, «Գրքի մայրաքաղաք»-ը, և այլն։ Այս տարի ևս նման միջոցառումներ հնարավորինս շատ պետք է կազմակերպվեն: Շարունակվում է համագործակցությունը Երևանի քույր քաղաքների հետ:
«Այս տարի ևս կիրականացվեն մի շարք հետաքրքրիր ծրագրեր»,- ասաց Մ. Բարաղամյանը՝ հավելելով, որ նախատեսվում է նաև Երևանում ստեղծել զբոսաշրջային կենտրոններ, ինչպիսիք գործում են զբոսաշրջային զարգացած երկրներում:
Լուսանկարը՝ PanARMENIAN Photo-ի
