Համանուն վեպի հիման վրա նկարահանված «Մոխրագույնի 50 երանգները» կինոֆիլմի իրենց առաջին արձագանքներում քննադատները պնդում են, որ ֆիլմն ավելի հետաքրքիր է ստացվել, քան գիրքը: Այս մասին հայտնում է BBC-ի ռուսական ծառայությունը:
Այսպես, Variety ամսագիրը ռեժիսոր Սեմ Թեյլոր-Ջոնսոնի ֆիլմն անվանում է գրող Էրիկա Լեոնարդ Ջեյմսի՝ իր կոմերցիոն հաջողությամբ հայտնի վեպի «էական բարելավում»:
Այդ տեսակետի հետ համաձայն է Guardian թերթը, ըստ որի՝ ենթադրվում էր հերթապահ կինոհարմարեցման ստեղծում, սակայն ստացվել է մի բան, որը գերազանցել է հանդիսատեսի սպասելիքները:
Միաժամանակ, ֆիլմի կինոարձագանքների ընդհանրացված վարկանիշը, Rottentomatoes կայքի տվյալներով, չի գերազանցում 42%-ը: IMDB կայքի օգտատերերը ֆիլմը գնահատում են 10-ից 3.4 միավոր:
«Մոխրագույնի 50 երանգները» վեպը Անաստեյշա անունով ուսանողուհու և սադոմազոխիստական հակումներով միլիարդատեր Քրիստիան Գրեի միջև սիրավեպի մասին է:
Variety-ի քննադատ Ջասթին Չանը կարծիք է հայտնել, որ ֆիլմը ստացվել է ավելի սուր, քան շուկա հանվող կինոարտադրանքի մեծ մասը: Չանի խոսքով՝ պոռնոգրաֆիայով հագեցած մեր դարում ֆիլմն ընդամենը փափուկ պրովոկացիա է երևում:
Իր հերթին, Guardian-ի քննադատ Ջորդան Հոֆմանը բարձր է գնահատել ֆիլմում Անաստեյշային մարմնավորած Դակոտա Ջոնսոնի դերասանական աշխատանքը:
Որ ֆիլմը համանուն վեպից ավելի ուժեղ է ստացվել՝ համաձայն է նաև Hollywood Reporter-ի քննադատ Շերի Լինդենը:
New York Post-ում կինոքննադատ Սառա Ստյուարտը գրել է, որ «Մոխրագույնի 50 երանգների» կինոտարբերակին հաջողվել է ազատվել «գրքի իսկապես անտեղի պահերից»:
«Մոխրագույնի 50 երանգները» Բրիտանիայում լայն վարձույթի կհանվի փետրվարի 13-ին:
