Եվրոպական միությունը պահանջել է անհատական տվյալների ավելի մեծ գաղտնիություն այնպիսի սոցիալական ցանցերում, ինչպիսին Facebook-ն է, կամ այնպիսի որոնողական համակարգերում, ինչպիսին Google-ն է: ԵՄ պաշտոնյաներն ասում են, որ նոր կանոնները կսահմանվեն 15-ամյա վաղեմություն ունեցող օրենքի փոփոխությունից հետո: Դրանք կընդունվեն հաջորդ տարի` հասարակական քննարկումներից հետո: Այս մասին հայտնում է Reuters-ը: Եվրահանձնաժողովի այս կապակցությամբ արված հայտարարության մեջ ասված է, որ տեխնոլոգիական զարգացումն ու անհատական տվյալների ապահովումը պետք է զուգահեռ լինեն:
Այս մտահոգություններն առաջացել են այն բանից հետո, երբ շատացել են խոսակցություններն անհատական տվյալների անապահովության մասին Google-ի, Microsoft-ի, Yahoo-ի ծառայություններից օգտվողների համար:
Հիշեցնենք, որ վերջերս հրապարակումներ եղան առ այն, որ Google-ը Streetview ծրագրի քարտեզները կազմելիս ծրագրի իրագործման սարքերով հավաքել է նաեւ էլեկտրոնային հասցեներ, գաղտնաբառեր: Այս առումով քննություն է սկսել Իտալիայում, Ֆրանսիայում, Գերմանիայում, Իսպանիայում, Կանադայում եւ Մեծ Բրիտանաիյում:
Սակայն Եվրահանձնաժողովում նաեւ չեն պատկերացնում, թե ոնց կարող են վերահսկեն իրենց պահանջների կատարումն ընկերությունների կողմից: