ՀՀԿ առաջնորդ Սերժ Սարգսյանը երեկ՝ նախընտրական քարոզարշավի շրջանակներում Տավուշի մարզ կատարած այցի ժամանակ, Մովսես գյուղի եկեղեցու բակում մոտեցել է տարեց մի տղամարդու և հետաքրքրվել, թե ինչ խնդիրներ ունեն: Մեծահասակ տղամարդը պատասխանել է, որ իրենց մեծ խնդիրը գյուղը դատարկվելն է, որ բոլորը Ռուսաստանի Դաշնությունում են: Ի պատասխան ծերունու դժգոհության՝ ՀՀԿ առաջնորդը հայտարարել է. «Ե՞ս եմ մեղավոր, որ քո էրեխեքը Ռուսաստանում են: Դրա համար է՞լ եմ ես մեղավոր, չթողնեիր՝ գնային»: Մովսես գյուղի բնակիչն էլ ասել է, թե եթե «զավոդ» լիներ, մարդիկ աշխատեին, երկիրը չէին լքի: «Գյուղում զավոդ լինե՞ր: Այ տենց եք մտածում, որ խիարը թարս ա բուսնում: Հայրի՛կ ջան, առանց այն էլ մենք շատ մեղքեր ունենք, ինչի՞ եք նոր մեղք բարդում մեր վրա: Եթե ասեիք գյուղում գազ, ջուր, ճանապարհ չլիներ, կասեի՝ ես եմ մեղավոր, դրա համար ես եմ պատասխանատու, բայց որ քո էրեխեքը գնացել են Ռուսաստան, ե՞ս եմ մեղավոր: Թող մնար գյուղում, հող մշակեր, անասուն պահեր»,- այսպիսի պատասխան է տվել «ապահով Հայաստան» կառուցել խոստացող Ս. Սարգսյանը:
«Ժողովուրդն» այս կապակցությամբ զրուցեց քաղաքական գործիչների հետ:
«Ժառանգություն» կուսակցության քարտուղար, Աժ նախկին պատգամավոր ՍՏԵՓԱՆ ՍԱՖԱՐՅԱՆ
– Պարոն Սաֆարյան, փաստորեն, Ս. Սարգսյանն արտագաղթի մեջ մեղադրում է բոլորին, բացի իրենից: Վերջինս անգամ հայտարարել է, թե ժողովուրդն է մեղավոր, որ «խիարը թարս է բուսնում»: Ինչպես կմեկնաբանեք նրա հայտարարությունը:
– Ուրեմն, կոպտությունը մի կողմ դրած, որը, իհարկե, հարիր չէ երկրի նախագահին, շատ ավելի դաժան է նրա մտածողությունը, որը դրսևորվում է այդ կոպիտ խոսելաձևով: Եթե երկրի նախագահը չի գիտակցում, որ արտագաղթի համար ինքը պատասխանատու է, ապա նշանակում է, որ այդ նախագահը շատ անպատասխանատու մարդ է:
– Կարելի է ասել, որ Ս. Սարգսյանը գոնե քարոզարշավի ժամանակ բացահայտում է, թե իրականում ինքը ով է, և ինչ պետք է իրենից սպասել, եթե նորից «վերընտրվի»:
– Կարծում եմ, որ ինքն ամեն քայլափոխի բախվում է բուռն դժգոհության, որը շատերը չեն տեսնում: Գոնե ես այդ ամենին իմ աչքերով եմ ականատես եղել: Ընդամենը մի քանի օր առաջ եմ վերադարձել Տավուշի մարզից, որտեղ հասկացա, թե ինչպիսի մեծ հասարակական դժգոհություն կա և փոփոխությունների ինչպիսի մեծ հասարակական պահանջ: Հավանաբար Ս. Սարգսյանը նկատում է, որ մարդիկ ահավոր դժգոհ են, պահանջում են փոխել իշխանություններին, և իր վերաբերմունքը նա արտահայտում է նման կոպտությամբ:
– Բայց չե՞ք կարծում, որ եթե նա ինչ-որ բանից «վախենար», իր ուժերի վրա վստահ չլիներ, թե կարող է այդ դժգոհությունների «տակից» միայնակ դուրս գալ, քարոզարշավին կգնար մեծ շքախմբով: Ս. Սարգսյանը այս անգամ շրջում է միայնակ՝առանց «թիմի»:
– Ես չեմ կարծում, որ նրա շրջապատն ի վիճակի է պաշտպանել իրեն: Օրինակ՝ Տավուշի մարզում հանդիպման ժամանակ նա իր հետ տարել է Տավուշի մարզպետին, որից ողջ մարզը «կուշտ» է: Ես դա ասում եմ որպես Տավուշի մարզի նախկին բնակիչ, որը շատ լավ տիրապետում է ժողովրդի տրամադրություններին: Քաղծառայողներից մինչև շարքային մարդիկ, գյուղապետերից մինչև տեղային պաշտոնյաներ ուղղակի հրաշալի գիտեն նրա գործունեության մասին: Ու այդ ամենի հետ կապված էլ ավելի լավ է, որ Ս. Սարգսյանը, որը չի ազատվում նման մարդկանցից, գոնե նրանց ուղեկցությամբ չի հայտնվում քարոզարշավի շրջանակներում մարդկանց հետ հանդիպելու: Ավելի լավ է միայնակ շրջի, քան ունենա նման շրջապատ:
Աժ ՀՀԿ խմբակցության պատգամավոր ԿԱՐԻՆԵ ԱՃԵՄՅԱՆ
– Տիկին Աճեմյան, Ս. Սարգսյանը Տավուշի մարզում քարոզարշավի ժամանակ հայտարարել է, թե արտագաղթի մեղավորն ինքը չէ ու անգամ մի տարօրինակ տեսակետ հայտնել թե այդպես են անում, որ «խիարը թարս ա բուսնում»:
– Ես, ճիշտն ասած, չեմ լսել այդ արտահայտությունը, դրա համար չեմ կարող մեկնաբանել: Երևի նա այլ բան է ասել: Իսկ ինչ վերաբերում է արտագաղթին, ապա համաձայն եմ չափազանցնում են, որովհետև կան ապահովված մարդիկ, որոնք երկրից դուրս են գալիս:
– Բայց Հայաստանում, ըստ վիճակագրական տվյալների, արտագաղթն օր օրի աճում է, ու հիմնականում մարդիկ՝ հատկապես գյուղաբնակները, գնում են, քանի որ աշխատանք չունեն:
– Դա մենակ մեր երկրում չէ, բոլոր երկրներում էլ այդ վիճակագրությունը կա: Ու ինձ չի թվում, որ նախագահը կոպիտ է խոսում, ես բազմիցս քարոզարշավի ժամանակ տեսել եմ, թե ինչպես է նա պատասխանում ժողովրդի հարցերին: Չեմ հավատում, քանի որ մշտապես տեսել եմ, որ նա շատ հանդուրժող լսում և պատասխանում է:
Աժ ԲՀԿ խմբակցության անդամ ՏԻԳՐԱՆ ՈՒՐԻԽԱՆՅԱՆ
– Պարոն Ուրիխանյան, ՀՀԿ առաջնորդն իրեն չի համարում արտագաղթի մեղավորը: Այդ դեպքում ովքե՞ր են մեղավորները:
– Մենք բազմիցս դրա մասին խոսել ենք, բնականաբար, իմ կարծիքը ոչ մի կերպ չի փոխվել: Արտագաղթն այն մեծ հիմնական խնդիրն է, որը չափից դուրս վտանգավոր հետևանքներ ունի երկրի ու ազգի համար: Մենք անընդհատ խոսել ենք դրա մասին ու ասել ենք, թե ովքեր են դրանում մեղավոր: Ես անգամ զարմանում եմ, որ նման հարց եք ինձ տալիս: Իսկ մնացածի հետ կապված՝ որևէ բան չեմ կարող ասել, քանի որ չհասկացա, թե այդտեղ վարունգն ինչ կապ ունի: Երևի այդ հարցում նախագահի խոսնակին դիմեք:
