Իրանի շրջակա միջավայրի պահպանության վարչության պետի տեղակալ Աբդոլրեզա Կարբասին հայտարարել է, որ BP-ն նավթ է արդյունահանում Կասպից ծովում բազմաթիվ խախտումներով և արդեն լուրջ վնաս է հասցրել շրջանի ջրային տարածությանը,- հայտնում է vestifinance.ru-ն:
Իրանի շրջակա միջավայրի պահպանության վարչության ներկայացուցիչները հայտարարել են, որ մի շարք դատական հայցեր են պատրաստում BP-ի դեմ՝ միջազգային դատական օրգաններ դիմելու համար:
Ըստ Կարբասիի՝ BP-ն լուրջ վնաս է հասցնում շրջակա միջավայրին՝ մշտապես նավթ, հորատման տիղմ և այլ թափոններ նետելով:
«Նրանք իրենց թափոններն ուղիղ Կասպից ծով են նետում՝ դրանք մեծ խորությամբ անցքերի մեջ լցնելով»,- կարծում է Կարբասին: Ըստ նրա՝ անցյալ տարի Կասպից ծովի հարավային ափի մոտ բազմիցս մեծ նավթահետքեր են հայտնաբերվել:
Տեղեկությունը, որ BP-ն կեղտոտում է Կասպից ծովը, հայտնվել էր նաև 2008-ին և 2009-ին, այս մասին ասված էր Wikileaks-ի հրապարակած փաստաթղթերում:
