Այսօր նախընտրական քարոզարշավի շրջանակներում ՀՀ նախագահի թեկնածու Րաֆֆի Հովհաննիսյանն այցելել է Արարատի մարզ:
Հովհաննիսյանը եղել է Դվինում, Սուրենավանում, Տափերականում, իսկ Մարմարաշենում բնակիչների հետ հանդիպելուց հետո այցելել է գյուղապետարան, ողջունել գյուղապետին և արդար ընտրություններ մաղթել: Նա նաև մոմ է վառել Սուրբ Գևորգ եկեղեցում:
Նախագահի թեկնածուն բոլոր այդ բնակավայրերում հանդես է եկել ելույթներով՝ երկրում ստեղծված իրավիճակը գնահատելով անընդունելի: Քննադատության ենթարկելով գործող նախագահ և ՀՀ նախագահի թեկնածու Սերժ Սարգսյանին, նա ասել է. «Պետությունն ունի բավարար փող գյուղացուն աջակցելու համար: Ընդամենը պետք է հարկել «ստվերում» մնացած օլիգարխներին, չմսխել բյուջեն ուռճացված գներով գնումներով և «ատկատներով»: Այդժամ մենք կարող ենք հարստացնել և ծաղկեցնել գյուղը, որը մեր ազգային անվտանգության անկյունաքարերից է»: Հովհաննիսյանը ևս մեկ անգամ շեշտել է ոռոգման ջրի գինը մինչև 90%-ով սուբսիդավորելու անհրաժեշտությունը և անընդունելի նկատեց, որ գյուղացին չի կարողանում լիարժեքորեն օգտվել բնական այդ բարիքից, որը շատ դեպքերում անօգուտ հոսում է երկրի սահմաններից դուրս:
Րաֆֆի Հովհաննիսյանը կոչ է արել փետրվարի 18-ին ակտիվորեն մասնակցել նախագահի ընտրություններին և ազատ, խղճի մտոք քվեարկել նախընտրելի թեկնածուի օգտին:
