Դեռ տարեվերջից մեր աչքի առաջ սկսել են փակվել փոքր ու միջին խանութներ, որոշ ընկերություններում էլ կրճատումներ են: «Զբաղվածության պետական գործակալությունից» «Առաջին լրատվական»-ի հետ զրույցում տեղեկատվության ապահովման բաժնի պետ Ցողիկ Բեժանյանը տեղեկացրեց, որ իրենք հակառակ պատկերն ունեն. 2013թ.-ին զանգվածային կրճատումների հետ կապված իրենք ավելի շատ դիմումներ են ունեցել, քան 2014թ.-ի ընթացքում:
Սա խնդրի պաշտոնական արձանագրումն է, այլ վիճակագրություն է աշխատանքի տեղավորման գործակալություններում: Նրանցից մեկի տնօրենն «Առաջին լրատվական»-ի հետ զրույցում հայտնեց, որ հունվարի 15-ից հետո իրենց գործակալություն է դիմել 84 գործազուրկ, ինչը նախորդ տարվա համեմատ մոտ 50-ով ավելի է:
Նրա խոսքով՝ աշխատանք փնտրողների հիմնական տարիքը տատանվում է 19-55-ի սահմաններում, սակայն եթե 2014թ.-ի առաջին կիսամյակում ամենաակտիվ աշխատանք փնտրողների 60 տոկոսը միջին տարիքի կանայք էին, ապա այժմ՝ միջին տարիքի տղամարդիկ:
Մեր զրուցակիցը նշեց, որ նոր հայտեր լրացրած աշխատանք փնտրողները հիմնականում տիրապետում են արհեստների, սակայն շինարարության ոլորտի պասիվության և արտագնա աշխատանքի չմեկնելու պատճառով մնացել են անգործ: Մնացած աշխատանք փնտրողների նկարագիրը, ըստ նրա, նույնն է՝ հիմնականում միջին և բարձրագույն կրթություն, լեզուների բավարար իմացություն, սակայն մեծ մասի դեպքում՝ աշխատանքային փորձի բացակայություն:
Աշխատանքի տեղավորման գործակալության տնօրենը նշեց, որ արհեստների տիրապետող գործազուրկներին հիմնականում աշխատանք առաջարկվում է մարզերում՝ Դիլիջան, Ջերմուկ, Քաջարան, Ալավերդի, շինարարության և հանքարդյունաբերության ոլորտներում: Մարզերում աշխատավարձը միջինը 120-220 հազար դրամ է, սակայն հիմնականում Երևանից այդ թափուր աշխատատեղերը չեն լրացվում. պատճառը կացության ծախսերն են:
Բեժանյանի տրամադրած տվյալներով՝ 2014թ. 3-րդ եռամսյակում, ըստ ԱՎԾ-ի, գործազրկության մակարդակը կազմում էր 17.1 տոկոս, որը նախորդ տարվա նույն ժամանակահատվածի համեմատ աճել է 1,7 տոկոսով: 2015թ.-ի հունվարի 1-ի դրությամբ աշխատանք փնտրողների թիվը կազմում է 72.6 հազար, որից 51.2 հազարը կանայք են, 16.9 հազարը` երիտասարդներ. ցուցանիշները նախորդ տարվա նույն ժամանակահատվածի համեմատ աճել են 12,2 տոկոսով (64.7 հազ. մարդ): Գործազուրկների թվաքանակը կազմում է աշխատանք փնտրողների 91.4 տոկոսը կամ 65.9 հազար: Այս ցուցանիշը նախորդ տարվա նույն ժամանակահատվածի համեմատ աճել է 17.9 տոկոսով (55.9 հազ. մարդ):
Տեղեկատվության ապահովման բաժնի պետը գործազրկության ցուցանիշի նման աճը պայմանավորում է նոր օրենսդրական կարգավորումներով, քանի որ հաշմանդամություն և հողի սեփականություն ունեցող անձինք ներառվել են այս ցանկում: Նրա խոսքով՝ իրական գործազրկության մակարդակը չի փոխվել:
Մինչդեռ գործակալության տնօրենը հակառակը պնդեց՝ ասելով, թե գնալով դիմումները շատանում են, ինչի պատճառներից մեկն էլ աշխատավարձերն են, որոնք որոշ կազմակերպություններում արդեն քանի տարի է՝ չեն վերանայվում. 80 հազար դրամ աշխատավարձը 3 տարի առաջ գուցե աշխատողին բավարարում էր, սակայն գնաճի օրեցօր աճող տեմպի պայմաններում 80 հազարը նվազագույնն է, որ կարելի է առաջարկել միջին կամ բարձր կրթություն ունեցող լավ որակավորմամբ մասնագետին:
Պաշտոնական վիճակագրությունը և աշխատաշուկայի իրական հատվածի գնահատականները ցույց են տալիս, որ զբաղվածության խնդիրը 2015թ.-ի մարտահրավերներից մեկն է, որովհետև և՛ հաշմանդամություն ունեցող մարդիկ, և՛ համայնքային, և՛ քաղաքաբնակ աշխատանք փնտրող բնակչությունը նոր աշխատատեղերի ստեղծմանն է սպասում: Ցավոք, տնտեսության ներկա վիճակը նոր աշխատատեղեր ունենալու դրական ազդակներ չունի, չնայած գործակալության տրամադրած տվյալներով՝ 2015թ.-ին 3217 հողօգտագործող, մի քանի հարյուր սահմանափակ կարողություններով գործազուրկներ աշխատանք կունենան:
