Ամբողջ աշխարհում չափահաս բնակչության 30 տոկոսը զարկերակային ճնշման հետ կապված խնդիրներ ունի: Ճնշմամբ տառապող մարդկանց թիվը միանշանակ աճի միտում ունի, որովհետև զարգացած երկրներում կյանքի տևողության բարձրացման հետ մեկտեղ հասարակության շրջանում հաճախադեպ են դառնում սրտանոթային հիվանդությունները: Այս մասին այսօր հրավիրված ասուլիսի ընթացքում տեղեկացրեց Կանխարգելիչ սրտաբանության կենտրոնի տնօրեն, ՀՀ ԱԱԻ-ի Սրտաբանության ԳՀԻ գիտության գծով փոխտնօրեն, Երևանի գլխավոր սրտաբան Պարունակ Զելվեյանը:
«Մենք չենք կարող նվազեցնել սրտանոթային մահացությունը, մեր նպատակը պետք է լինի կյանքը երկարացնելը: Մեզ մոտ նկատվում է սրտանոթային հիվանդությունների երիտասարդացում, որը մեզ համար մտահոգիչ է, և մեր ամբողջ գործունեությունը պետք է ուղղված լինի հիմնականում սրտանոթային հիվանդությունների կանխարգելմանը, որովհետև միակ ուղղությունը, որ մենք կարող ենք հասարակությանը առողջացնել, այն է, որ կարող ենք նվազեցնել սրտանոթային հիվանդությունների տարածվածությունը` երիտասարդների շրջանում կանխարգելիչ սրտաբանության հիմունքների ներդրմամբ:
Կանխարգելելը շատ ավելի հեշտ է, քան բուժելը: Եթե այսօր կանխարգելենք դա շատ ավելի էժան կլինի պետության համար, քան հետո սրտանոթային բարդությունները բուժելը»,- նկատեց Պարունակ Զելվեյանը և ավելացրեց, որ կյանքի որակը ևս ազդում է սրտանոթային հիվանդությունների վրա, և ամբողջ աշխարհում արդյունավետ բուժման չափանիշներից մեկը կյանքի որակի գնահատումն է:
