Մեր օրերում մինչև այժմ էլ գաղտնի միություններ են գործում, սակայն համացանցի հայտնվելուն պես գաղտնիքներ պահելն ավելի է դժվարացել: Չնայած գաղտնի միություններն անցած ժամանակների մի մասնիկն են դարձել, նրանք դեռ ունեն մեզ հետաքրքրելու ուժը: Օրինակ՝ uainfo.org-ը 7 այդպիսի կազմակերպություններ է ներկայացնում, որոնք մինչև օրս էլ որոշ ազդեցություն են պահպանում:
Մասոններ
Մասոններն ամենահին և կայուն միությունն են (որոնց մասին համենայնդեպս հայտնի է մարդկանց), որ դեռևս գոյություն ունի: Նրանք ամուր միավորված են գաղտնի նշաններով, տարօրինակ ծեսերով և բարդ ներքին կարգով` որտեղ հասարակության անդամները, ըստ կուտակած փորձի ու հարգանքի, մասոնների շրջանում աստիճանաբար ավելի բարձր պաշտոններ են ձեռք բերում: Ի սկզբանե մասոնությունը ստեղծվել է մի քանի փոքր համայնքների միավորման միջոցով: Առաջին «մասոնական ժողովարանը կամ ֆրանկմասոնական լոժան» հիմնադրվել է Լոնդոնում 1717 թվականին: Ժամանակակից գաղտնի կազմակերպություններն օրինակ են վերցնում մասոններից` ստեղծելով իրենց գաղտնի նշանները, ծածկագրով բառերը, ներքին ծեսերը և բարդ հիերարխիական շղթան:
Իլյումինանտներ
Իրենց գոյության ամենասկզբում իլյումինանտներն առանձնացել են մասոններից և այդ պահից սկսած՝ դավադրության տեսության սիրահարների հետաքրքրության առարկան են դարձել: Շատերը իլյումինանտներին մեղադրում են հնարավոր բոլոր աղետների, գաղտնիքների ու տնտեսական ճգնաժամերի մեջ: Չկա որևէ ապացույց այն մասին, որ իլյումինանտները մինչ այժմ գոյություն ունեն, բայց սա միայն ավելացնում է նրանց խորհրդավորությունը:
Գանգ և ոսկորներ
«Գանգ ու ոսկորներ» միությունը, հնարավոր է, բոլոր թվարկվածներից ամենաքիչ գաղտնին լինի: Այն հիմնվել է 1832 թ. Յելի համալսարանում Ուիլյամ Ռասելի կողմից: Սկզբում «Գանգ և ոսկորները» կոչվել է Eulogian Club: Այսօր կազմակերպությունը կարող է պարծենալ նրանով, որ իր անդամների շարքերում պետությունների բազմաթիվ ղեկավարներն են (այդ թվում` առնվազն երեք նախագահ), արդյունաբերական մագնատներ և հատուկ ծառայությունների ղեկավարներ: Այս կազմակերպության անդամները հանդիպում են շաբաթը երկու անգամ և ծեսեր են անցկացնում, իսկ կազմակերպության նպատակն իբրև թե վերցված է մասոններից, սակայն շատերը պնդում են, որ իրականում «Գանգ և ոսկորները» ոչ այլ ինչ է, քան ուսանողական եղբայրություն:
Վարդի և խաչի կարգ
«Վարդի և խաչի կարգ» եղբայրությունը հիմնվել է 15-րդ դարում Քրիստիան Ռոզենկրեյցի կողմից: Նրանք իբր ամբողջական փոխակերպման հասնելու համար ոգեհարցության էին դիմում: Երեք հրովարտակների հրապարակումներից երկու դար անց նրանք հայտնի դարձան հասարակությանը: Հմայության տեսության երկրպագուները կարծում էին, որ հենց ռոզենկրեյցականներն են հիմք դարձել մասոնների, իլումինանտների և Անտեսանելի կոլեգիայի համար ու կանգնել նորագույն պատմության ամեն մի նշանակալի հեղափոխության ետևում:
Բիլդերբերգյան ակումբ
1954 թ. աշխարհի ամենաազդեցիկ մարդիկ հավաքվեցին նույն հյուրանոցում, որպեսզի քննարկեն հաջորդ տարվա համար գործողությունների գլոբալ ռազմավարությունը: Այդ ժամանակվանից սկսած նրանք ամեն տարի հանդիպում են, սակայն նրանց բանակցությունների թեմաները խստորեն գաղտնի են պահվում: Տեխնիկապես Բիլդերբերգյան ակումբը գաղտնի միություն չէ, քանի որ դրա գոյությունը և անդամները կասկածելի չեն, սակայն հասարակությունն անհանգստանում է անդամների ազդեցիկությունից և ամենամյա բանակցությունների գաղտնիությունից:
Սիոնի երեցներ
1920-ականներին մեծահարուստ Հենրի Ֆորդին պատկանող թերթը մի շարք հոդվածներ է տպել, որտեղ մեջբերումներ են արվել ռուսական «Սիոնի երեցների արձանագրությունները» փաստաթղթից: Դրանք արագ խաբեություն են անվանվել, սակայն հոդվածները հավաքվել են մեկ գրքում, որը կոչվում է «Միջազգային եբրայականություն. համաշխարհային սկզբնական խնդիրը»: Գիրքը կարդացել է Ադոլֆ Հիտլերը, ոգեշնչվել է այնտեղ հնչեցված գաղափարներից և դրանցից շատերը կիրառել է: Ամբողջ աշխարհում հակասեմականության տեսության կողմնակիցները դեռ հավատում են «Արձանագրությունների» իսկությանը:
Տամպլիերներ
12-րդ դարի սկզբին ինը ասպետներ երդվեցին պաշտպանել Սուրբ Հողով անցնող ուխտավորներին: Նրանց միացան նաև այլ ասպետներ: Այս միությունը աճեց, հարստություն, փառք և իշխանություն ձեռք բերեց: Մեր օրերում նրանք այլ գաղտնի միությունների հովանավորներ և քրիստոնեական գանձերի պահապաններ են համարվում: Սակայն վերջնական արդյունքում տամպլիերների օրդենի բոլոր անդամներին կտտանքների են ենթարկել և սպանել, իսկ միությունը՝ ցրել:
