12 մարդուց բաղկացած մի խումբ բրիտանական դատարան է դիմել՝ ընդդեմ Google ընկերության՝ նրան մեղադրելով օգտատերերի գաղտնիության քաղաքականությունը խախտելու համար,- հայտնում է SkyNews-ը:
Նշվում է, որ Google-ի գործողություններից կարող էր տուժել մինչև 10 մլն մարդ: Olswang իրավաբանական ընկերության, որը ներկայացնում է 12 հայցվորների շահերը, տվյալներով՝ Google-ի օնլայն միջոցներն օգտատերերի համար չեն ապահովում համացանցում լինելու գաղտնիությունը: Սա կապված է այն բանի հետ, որ երկար ժամանակ ամերիկյան ընկերությունն օգտագործել է իր իսկ մշակած էլեկտրոնային կոդը, որը հնարավորություն է տվել հետևելու գլոբալ ցանցում հաճախորդների ակտիվությանը՝ նրանց այդ մասին չտեղեկացնելով,- փոխանցում է ITAR-TASS-ը:
Խնդիրը վերաբերել է Միացյալ Թագավորության բոլոր բնակիչներին, որոնք համացանց մտնելու համար օգտագրծել են Apple կորպորացիայի մշակած Safari բրաուզերը: Google-ն աննկատ բրաուզերի մեջ է ներբեռնել իր սեփական ծրագրային ապահովումը, որը cookies ֆայլեր է ձևավորել: Այդ հավելվածների շնորհիվ էլ ընկերությունը տեղեկություն է ստացել այն մասին, թե որ կայքերում և որքան ժամանակ են անցկացնում օգտատերերը:
Olswang-ի ներկայացուցիչները հայտնել են, որ սա շարունակվել է 2011-ի ամառվանից մինչև 2012-ի գարնան սկիզբը: Այդ ժամանակում ամերկյան ինտերնետ հսկան կարող էր տեղեկություն ստանալ Apple սարքեր ունեցող գրեթե 10 մլն բրիտանացու մասին:
2012-ի մարտին Google-ը կորպորացիայի գաղտնիության միասնական քաղաքականություն է ընդունել: Այն ենթադրում է, որ ընկերությանը պատկանող տարբեր ծառայություններ կարող են միմյանց միջև օգտվողների մասին տեղեկություն փոխանակել: Ինտերնետ հսկան մինչև հիմա հստակ չի տեղեկացնում օգտվողներին այդպիսի գործողությունների մասին, ինչը շատ միջազգային կարգավորողների կարծիքով՝ ապօրինի է:
