ՀՅԴ խմբակցության ղեկավար Վահան Հովհաննիսյանն այսօր հայտարարեց, թե քաղաքական դաշտը սև ու սպիտակի բաժանելը ձեռնտու է երկու քաղաքական ուժի` իշխանություններին ու Հայ ազգային կոնգրեսին:
«Ծայրահեղական կոչերը ծայրահեղականներին էլ ձեռք են տալիս: Մնացյալ հասարակությունը սկզբում շվարած նայում էր երկուսին, հիմա ժամանակն է միավորվի և ասի` գնացեք ստեղից` դուք էլ, դուք էլ»,- հայտարարեց նա:
Անդրադառնալով Հայ ազգային կոնգրեսի ներկայացուցիչ Դավիթ Շահնազարյանի` ՀՅԴ-ին ու «Ժառանգությանն» ուղղված հայտարարությանը, թե պետք չի այրել կամուրջները, Վահան Հովհաննիսյանն ասաց, որ լավ կլիներ, եթե այդ խորհուրդը Կոնգրեսի գլխում ծագեր այն ժամանակ, երբ նրանք անխնա ծաղրում էին ու շարունակում են ծաղրել Րաֆֆի Հովհաննիսյանին` հացադուլի համար: «Այ երբ Դավիթ Շահնազարյանը ԿԳԲ-ի պետ էր, իսկ ես էդ շենքի ներքևի նկուղում, բանտում նստած էի, թող այդ ժամանակ մտածեր կամուրջների մասին»,- հայտարարեց Վահան Հովհաննիսյանը:
Խոսելով Կոնգրեսի հետ համագործակցության հնարավորության մասին` Վահան Հովհաննիսյանը նշեց, թե «կան գաղափարական հակասություններ, և Կոնգրեսը գաղափարապես ավելի մոտ է իշխանություններին»: Այնուհանդերձ, պարոն Հովհաննիսյանը չի բացառում Կոնգրեսի հետ համագործակցությունը:
«Բայց ոչ մի իրեն հարգող քաղաքական ուժ չի կարող համագործակցել լիդերի շուրջ, լիդերի անուն-ազգանվան շուրջ: Համագործակցել ծրագրի, կոնկրետ անելիքի, արդար ընտրության` խնդրեմ, բայց ոչ թե այն հարցի շուրջ, թե ով է լինելու ազգի պապան կամ պապին: Էդ թեմայով մենք որևէ մեկի հետ համագործակցել չենք կարող»,- ասաց նա:
Ընտրություններին ընդդիմության միավորման մասին Հովհաննիսյանը նշեց հետևյալը. «Ուրիշ խնդիր կա: Ինչ մոդել պետք է ունենա ընդդիմության դաշտում միավորվելու ձևը: Նման մոդել մշակված չէ»: