Հայ ազգային կոնգրեսի ներկայացուցիչ Դավիթ Շահնազարյանը, այսօր ՄԱԱ-ում պատասխանելով լրագրողների հարցերին, հստակեցրեց իր կողմից ներկայացված գնահատականները. «Այսօր աշխարհաքաղաքական կենտրոնները շատ ուշադիր հետևում են Հայաստանում ընթացող ներքաղաքական գործընթացներին, և, ըստ էության, նրանց դիրքորոշումներն ու քաղաքականությունը Հայաստանի հանդեպ կախված է լինելու նրանից, թե ինչպես կզարգանան այդ գործընթացները: Ես նկատի ունեմ բոլոր աշխարհաքաղաքական կենտրոնները»:
Այնուհետև Կոնգրեսի ներկայացուցիչը հավելեց, որ տարածաշրջանային անվտանգության հարցերն այսօր ունեն աշխարհաքաղաքական նշանակություն և կախված նրանից, թե ինչ իշխանություն և ինչ քաղաքական իրավիճակ կլինի Հայաստանում. դրանից են կախված լինելու Հայաստանի հարաբերությունները մեր հարևանների և աշխարհաքաղաքական կենտրոնների հետ. «Աշխարհաքաղաքական այդ կենտրոնների քաղաքականությունը Հայաստանի հանդեպ չի կարող տարանջատվել նրանց քաղաքականությունից ընդհանրապես տարածաշրջանի և տարածաշրջանային գործընթացների նկատմամբ` ներառյալ ԼՂ-ի հարցը»:
Անդրադառնալով ապրիլի 8-ին կայանալիք հանրահավաքի անակնկալներին, նա նախ կանխատեսեց, որ իր բազմամարդությամբ առնվազն չի զիջելու նախորդ հանրահավաքներին. «Ապրիլի 8-ի հանրահավաքը շատ կարևոր հանրահավաք է լինելու: Մենք առաջարկների, նախաձեռնությունների մասին հայտարարում ենք միայն հանրահավաքի ժամանակ: Խոստանում եմ, որ չեք հիասթափվի: Այն, որ արտահերթ ընտրությունները անխուսափելի են` դրանում որևէ մեկդ որևէ կասկած կարող եք չունենալ: Այս իրավիճակում միակ ելքը կարող են լինել արտահերթ ընտրությունները»:
«Առաջին լրատվական»-ի հարցին, թե այն հանգամանքը, որ աշխարհաքաղաքական կենտրոնները հետևում են հայաստանյան ներքաղաքական գործընթացներին, հի՞մք է ենթադրելու, որ եթե 2008 մարտի 1-ին նման իրավիճակ ստեղծվի` իշխանությունները երկրորդ անգամ մարտի 1-ի նման քայլի չեն դիմի, Դ. Շահնազարյանը պատասխանեց. «Այս երեք տարիների ընթացքում ՀԱԿ-ը շատ ճշգրտորեն միշտ հաշվարկել է իր քայլերը, և նույնիսկ այն պահերին, երբ մեր գնահատականով իշխանությունները կարող էին նման գործողություններ կատարել, մենք նրանց այդ հնարավորությունը չենք տվել: Ավելի քան համոզված եմ, որ արտահերթ ընտրությունների միջոցով իշխանափոխությունը Հայաստանում անցնելու է առանց որևէ ցնցումների: Ավելին` մենք բացառում ենք իշխանության կողմից նման ողբերգության, նման ահաբեկչության կրկնությունը: Եկեք չմոռանանք, որ կան այլ երկրների օրինակներ, բայց ամենավառ օրինակը հենց Հայաստանն է, մենք ունենք դրա փորձը, որ, ի տարբերություն Խորհրդային միության շատ երկրների, 1988-90 թթ. այդ ամենը Հայաստանում տեղի ունեցավ անարյուն և առանց այնպիսի ցնցումների, ինչպիսիք եղան Վրաստանում, Ադրբեջանում, Բալթյան հանրապետություններում»:
«Առաջին լրատվական»-ի հաջորդ հարցը վերաբերում էր նրան, թե ինչպե՞ս է պարոն Շահնազարյանը պատկերացնում իշխանափոխությունը ՀԱԿ-իշխանություն երկխոսության պայմաններում` հայտնի երեք պահանջների իրականացումից հետո, երբ անգամ նախորդ հանրահավաքում ոստիկանության հետ կայացած համաձայնությունը որոշ շրջանակներ ներկայացրին որպես գործարք, և արդյոք որևէ իշխանություն կարո՞ղ է կամավոր հրաժարվել իշխանությունից:
«Մենք հստակ հայտարարել ենք, որ երկխոսությունը վարվելու է մեկ թեմայի շուրջ` դրանք արտահերթ ընտրություններն են: Ավելացնեմ, որ արտահերթ ընտրությունները որակապես տարբերվում են հերթականից, և սա է լինելու երկխոսության միակ թեման»,- նկատեց Դ.Շահնազարյանը: Իսկ գործարքի շուրջ խոսակցություններին անդրադառնալով` նա հայտարարեց. «Իշխանության ներկայացուցիչների հետ եղե՞լ են շփումներ… Իհարկե եղել են` մի քանի տասնյակ հազար մարդկանց աչքի առաջ` Ազատության հրապարակի շրջակայքում, Մատենադարանի մոտ, և ամենայն պատասխանատվությամբ հայտարարում եմ, որ որևէ այլ շփում ու կոնտակտ չի եղել: Թեև եթե նույնիսկ լիներ էլ` այստեղ ոչ մի կրիմինալ չկա, որովհետև եթե լիներ՝ մենք այդ ամենը հասարակությունից չէինք թաքցնի: Օրինակ` 1988-90 թթ. Շարժման ընթացքում մենք գործող իշխանությունների հետ քսանչորսժամյա կապի մեջ էինք, որովհետև այն ժամանակվա կոմունիստական իշխանությունն էլ, մենք էլ ընդհանուր շահեր ունեինք` Կոմկուսն էլ չէր ուզում, որ որևէ ցնցում լիներ, արյուն թափվեր, մենք էլ չէինք ուզում: Երբ 1945 թ. Բեռլինը շրջապատված էր, և ֆաշիզմի վերջին օրերն էին` Ռայխի գրասենյակի հետ ուղղակի կապ էր անցկացված»,- հիշեցրեց Դ. Շահնազարյանը:
