Ահաբեկչական կազմակերպությունը, որն իրեն դասում է ԴԱԻՇ-ին, հայտարարել է Իրանի արևելյան սահմանի երկայնքով իր ջոկատները ցրելու մասին։ Այդ առնչությամբ հանրապետության ներքին գործերի փոխնախարար Հուսեյն Զոլֆակարին հայտարարել է, որ անվտանգության ուժերն ուսումնասիրում են իրավիճակն ու գնահատում նոր խմբավորումից պոտենցիալ սպառնալիքի մակարդակը։ Այս մասին գրում է TASS գործակալությունը։
Վերջին ամիսներին Իրանն ակտիվորեն ամրացնում է Աֆղանստանի և Պակիստանի հետ իր սահմանների պաշտպանությունը, որտեղից ավազակախմբեր են ներթափանցում, հարձակվում սահմանապահների ու խաղաղ բնակիչների վրա։
Ինչպես հստակեցնում է Fars գործակալությունը, Իրանն արևելյան սահմանին տեղադրում է դիտորդական նոր սարքավորումներ, ստեղծում նոր ճանապարհներ ու սահմանային անցակետեր։ Սահմանապահներին օգնության են ուղարկվել Իսլամական հեղափոխության պահակազորի ստորաբաժանումներ և «Բասիջ» ժողովրդական աշխարհազորի ջոկատներ։
