Հայաստանը ծրագրում է այս տարի եվրոպարտատոմսեր թողարկել։ Այս մասին հայտարարել է ֆինանսների նախարարությունը։ Հաղորդվում է, որ նման քայլ կարվի՝ փոխհատուցելու առանցքային առևտրային գործընկեր Ռուսաստանում տնտեսական ճգնաժամից առաջացած հետևանքները։ Թեմային անդրադարձել է Reuters գործակալությունը՝ նշելով, որ 3.2 մլն բնակչություն ունեցող նախկին խորհրդային պետությունը սերտորեն կապված է Ռուսաստանի հետ առևտրով և դրամական փոխանցումներով։ Գործակալությունը գրում է, որ ռուբլու փոխարժեքի վերջին կտրուկ անկումը, որին նպաստել են նավթի ցածր գինն ու Ուկրաինայի համար Արևմուտքի կողմից սահմանված պատժամիջոցները, հայկական դրամին ցած է գցել իր հետ ։
Գործակալությունը նշում է, որ երկուշաբթի 1 դոլարի փոխարժեքը եղել է 474 դրամ, մինչդեռ մեկ տարի առաջ 407 դրամ էր։
«Անհրաժեշտ է ապահովել արտաժույթով կապիտալի ներհոսք՝ չեզոքացնելու համաշխարհային տնտեսության բացասական հետևանքները»,- ասվում է նախարարության հայտարարությունում։ Հրապարակման մեջ նշվում է, որ Հայաստանը Վլադիմիր Պուտինի Եվրասիական միության անդամ է, որը «հուսով է մրցակցել» ԵՄ-ի հետ։
Moody’s-ը հունվարին իջեցրել էր Հայաստանի պարտատոմսերի վարկային վարկանիշը՝ Ba2-ից դարձնելով Ba3, կանխատեսումը փոխելով կայունից բացասականի։
