Ադրբեջանական SalamNews.org կայքի հաղորդմամբ, Ադրբեջանի իսլամական կուսակցության (ԱԻԿ) նախագահ Էլչին Մանաֆովը հայտարարել է, որ իրենք հերթական անգամ դիմել են իշխանություններին` Բաքվի որևէ վայրում ցույց կազմակերպելու թույլտվության համար.
«Սկզբում մենք ցույցի անցկացման համար ընտրեցինք Ազատության հրապարակը, որպեսզի Ադրբեջանի տարբեր շրջաններից ու քաղաքներից ժամանողները կարողանան հեշտությամբ գտնել այն: Մենք ակնկալում ենք, որ ցույցին կմասնակցի նվազագույնը 10.000 մարդ, հնարավոր է` ավելի շատ:
Այժմ մենք իշխանություններին խնդրում ենք այդ նպատակով հատկացնել Բաքվում որևէ վայր, որը իրենք նպատակահարմար կհամարեն: Մենք ցանկանում ենք, որ ցույցի անցկացման վայրը նախապես համաձայնեցված լինի իշխանությունների հետ:
Մեր այդ ակցիան մեծ հետաքրքրություն է առաջացրել իսլամական աշխարհում: Մենք արդեն դրան մասնակցելու դիմումներ ենք ստացել արտերկրից: Դա վերաբերում է նույնիսկ Ռուսաստանին (Թաթարստան) և ԱՊՀ մի շարք երկրների: Մեր ակցիային մասնակցել ցանկացողներն անգամ արդեն ինքնաթիռի տոմս են գնել»:
Նշվում է, որ ցույցի ժամանակ ԱԻԿ-ը հանդես է գալու Ղարաբաղը հայկական «օկուպացիայից ազատագրելու», հիջաբ (մահմեդական գլխաշոր) կրելու արգելքի վերացման և «խղճի բանտարկյալներին» ազատ արձակելու կարգախոսներով:
Հիշեցնենք, որ ԱԻԿ-ը հիմնադրվել է 1991 թվականին և պաշտոնապես գրանցվել 1992 թվականին:
