Բանակային երկու ամսվա ընթացքում ծանր հիվանդություններ ձեռք բերած 19-ամյա Մայիս Գեղամյանն ու ծնողները հույս ունեն, որ քիմիական թերապիայի համար անհրաժեշտ 2 միլիոն դրամը հրաշքով կհայթայթեն, և բուժումը չի ընդհատվի։
Անհրաժեշտ գումարը թույլ կտա երկարացնել Մայիսի կյանքը, հնարավորության դեպքում կհասցնեն արտասահման:
«Հավաքում ենք, հարազատ-բարեկամից նորից հավաքում եմ, իմ գյուղից, գյուղն է առաջինը կանգնել իմ կողքին», – «Ազատության» հետ զրույցում ասել է հայրը՝ Պետրոս Գեղամյանը։
Աշտարակի շրջանի Արուճ գյուղից առողջ բանակ զորակոչված, բայց զինվորի կյանքով ընդամենը երկու ամիս ապրած երիտասարդը տուն է վերադարձել մեկ ոտքով։ Չարորակ հիվանդության պատճառով աջ ոտքը հեռացրել են, սակայն քաղցկեղը ախտահարել է նաև թոքերը։ Նա այժմ քիմիաթերապիա է ստանում։
«Մի քիմիան՝ մենակ դեղորայքը, որ գնում ենք այլ վայրից, 480 հազար արժե, քիմիայից հետո պետք է վերականգնողական կուրս ացնի, որը քիմիայից ավելի թանկ է նստում»,- ասել է է հայրը։
Որևէ մեկին չմեղադրելով՝ Մայիսն ու ծնողները շեշտում են՝ եթե բանակում ժամանակին անհրաժեշտ միջոցները ձեռնարկեին, հիվանդությունը չէր խորանա։ Զորամասում վազելիս նա սայթաքել է, վնասել աջ ոտքը։ Ասում է՝ բուժկետում որևէ հետազոտություն ու բուժում չեն ձեռնարկել։ Ասել են՝ կանցնի։ Բայց ոտքն այտուցվել է ու պարզվել, որ երիտասարդը քաղցկեղ ունի։
«Ինձ չեն հավատացել, մտածել են՝ ես էլ եմ սուտ ասում, ուղղակի սաչոկը ասածը հենց իրենք են»,- ասում է Մայիսը։
«Եթե սկզբնական շրջանում վնասված ոտքը թեկուզ մի շաբաթով անշարժացներին, էդ ուռուցքը չէր առաջանա։ Ուշադրություն չեն դարձրել»,- ասում է օնկոլոգների հետ զրուցած հայրը։
Մանրամասները՝ «Ազատության» տեսանյութում
