ՀՀ Նախագահի թեկնածու, ԱԻՄ ղեկավար Պարույր Հայրիկյանը փոշմանել է, որ 1996թ․ սատարել է նախագահի թեկնածու Վազգեն Մանուկյանին: Այս մասին Պարույր Հայրիկյանը հայտարարել էր երեկ լրատվամիջոցներից մեկի հետ զրույցում: «Առաջին լրատվական»-ի հետ զրույցում ԱԺՄ նախագահ Վազգեն Մանուկյանը չցանկացավ անդրադառնալ Պարույր Հայրիկյանի այդ մեկնաբանությանը:
Հարցին, թե 1996թ․ նախագահական ընտրություններում իր շուրջ քաղաքական կոնսոլիդացիա տեղի ունեցավ, ի՞նչն էր պատճառը, որ գալիք նախագահական ընտրություններին ընդդիմության միասնական թեկնածու չձևավորվեց, թեև դրա մասին շատ խոսեցին՝ արձագանքեց, որ դա բարդ ու երկար խոսակցություն է:
Սակայն Վազգեն Մանուկյանն ասաց․ «Այնպես չէ, որ բոլոր նախագահական ընտրություններին պարտադիր միասնական թեկնածու պետք է ձևավորվի: Տարի կա, որ ստացվում է և պետք է, տարի կա՝ ոչ»:
Հիշեցնենք, որ «Երկրի հարցը» հաղորդաշարի եթերում Պարույր Հայրիկյանը հայտարարել էր, որ փոշմանել է, որ 1996թ. սատարել է Վազգեն Մանուկյանին` ասելով, որ այդպես իր հեղինակությանը վնասեց: Կարող էր հօգուտ նրա չհանել թեկնածությունը:
Հայրիկյանը չէր բացառել, որ կլինի 1996թ. միավորումը, եթե որոշ մարդիկ իրենց ամբիցիաներից վեր կանգնեն:
