Ռուսական Forbes ամսագիրը կազմել է թոփ 30 գործարարների ցուցակը, ովքեր 2014 թվականին առավել մեծ եկամուտ են ունեցել Ռուսաստանում իրենց պատկանող կոմերցիոն անշարժ գույքը՝ գրասենյակային և առևտրային կենտրոնները, հյուրանոցներն ու պահեստները վարձակալության հանձնելու արդյունքում։
Հայ գործարար Սամվել Կարապետյանը զբաղեցնում է վարկանիշային աղյուսակի երկրորդ հորիզոնականը: «Տաշիր» ընկերություների խմբի սեփականատերը 2014թ. ստացել է 1.08 մլրդ դոլար։ «Տաշիրին» են մասնավորապես պատկանում 19 առևտրա-ժամանցային կենտրոններ, որոնք տեղակայված են Ռուսաստանի 9 քաղաքներում, որոնց թվում է «Ռիո» ցանցը։ «Տաշիրի» առավել խոշոր օբյեկտների թվում է նաև մոսկովյան Novotel Moscow City հյուրանոցը։
Վարկանիշում ներառված են ինչպես մասնավոր անձիք, այնպես էլ ընկերություններ՝ ռուսական և արտասահմանյան։ Առաջին հնգյակում ներառված անձանց եկամուտը տատանվում է 1.4 միլիարդ դոլարից 520 մլն դոլարի միջակայքում։
Աղյուսակի առաջին տեղում է «Կիևսկայա պլոշչադ» ընկերությունը (1.4 մլրդ դոլար), որն այդ վարկանիշը գլխավորում է երրորդ տարին անընդմեջ։ Ընկերությանը պատկանող կոմերցիոն անշարժ գույքի առավել խոշոր օբյեկտները գտնվում են Մոսկվայում։ Դրանք են՝ «Ֆուդ Սիթի» գյուղատնտեսական շուկան, Radisson Royal Moscow հյուրանոցն ու «Եվրոպեյսկիյ» առևտրա-ժամանցային կենտրոնը։
Եռյակը եզրափակում է «Իկեա Մոս»-ի սեփականատեր հանդիսացող Ինգվար Կամպրադի ընտանիքը։ Նրանց եկամուտը կազմել է 790 մլն դոլար։
Վարկանիշում ներառված է նաև «Չելսի» ֆուտբոլային ակումբի սեփականատեր Ռոման Աբրամովիչը (17 –րդ տեղ, 155 մլն դոլար)։
«Ռուսական անշարժ գույքի թագավորների» շարքում հայտնվել են նաև մի շարք խոշոր օտարերկրյա ընկերություններ՝ Morgan Stanley Real Estate Investing ամերկյան ներդրումային հիմնադրամը (18-րդ տեղ, 154 մլն դոլար), ամերիկյան Goldman Sachs բանկը (6-րդ տեղ, 494 մլն դոլար)։