Այսօր Հայ ազգային կոնգրեսի ներկայացուցիչ Դավիթ Շահնազարյանը, որը հյուրընկալվել էր Մամուլի ազգային ակումբում, Հայաստանում ստեղծված իրավիճակը գնահատեց աննախադեպ և առանձնացրեց. «Առաջին` սոցիալ-տնտեսական ծայրահեղ ծանր իրավիճակից ելքերը Հայաստանի ժողովուրդը տեսնում է միմիայն քաղաքական հարթության մեջ և միմիայն քաղաքական փոփոխությունների արդյունքում: Երկրորդ` առավել, քան երբևէ, Հայաստանում հստակեցված է քաղաքական դաշտը` իշխանություն, միավորված ընդդիմություն և ՀԱԿ-ին ընդդիմադիր հասարակական միավորներ: Երրորդ` Հայաստանում օրինական իշխանության հաստատման միակ ռեսուրսը այսօր ՀԱԿ-ն է: Չորրորդ` Հայաստանի ներքաղաքական օրակարգը ձևավորում է ՀԱԿ-ը: Հինգերորդ` Հայաստանում ընթացող ներքաղաքական գործընթացները գերիշխում են արտաքին հարցերի նկատմամբ: Միջազգային հանրության, մեր հարևանների և միջազգային կենտրոնների վերաբերմունքը կախված է Հայաստանում ընթացող ներքաղաքական գործընթացներից»:
Բանախոսը կարևորեց նաև այն, որ միջազգային հանրության և եվրոպական կառույցների վերաբերմունքը քաղաբանտարկյալների հարցում շատ նման է բանակցությունների, որոնք տարվում եմ ահաբերկիչների հետ` պատանդների ազատման համար:
Դ.Շահնազարյանը ընդգծեց, որ Կոնգրեսի նախորդ հանրահավաքում տասնհինգ պահանջներից ընդգծվեցին երեքը` որոնցից մեկն այս էր` իշխանությունները հայտարարեն, որ մարտի 1-ի սպանությունները կբացահայտվեն: Կոնգրեսի ներկայացուցիչը շեշտեց, որ այդ պահանջը չի կատարվել, ինչը և ապացուցում է, որ կազմակերպիչը եղել է իշխանությունը, այդ լռությունը նա գնահատեց որպես ինքնախոստովանություն: