Ստամբուլի հայերով բնակեցված Սամաթիա թաղամասում հունվարի 22-ի երեկոյան հերթական հարձակումը տեղի ունեցավ թաղամասի տարեց հայ կանանցից մեկի վրա։ Տարեց հայ կինը դաժան ծեծի էր ենթարկվել, որի արդյունքում կոտրվել էր կնոջ ակնոցը և ապակին վնասել էր նրա աչքը։ Հունվարի 23-ի առավոտյան կնոջը վիրահատության են ենթարկել։
Թուրքիայի Մարդու իրավունքների միության Ստամբուլի գրասենյակը կոչ էր արել հունվարի 23-ին, ժամը 16։00-ին, բողոքի ակցիա իրականացնել՝ ընդդեմ այլատյացության հողի վրա կատարվող բռնությունների։
2012թ. դեկտեմբեր ամսվա ընթացքում ևս երկու բռնություն էր կատարվել միևնույն թաղամասում՝ դեկտեմբերի սկզբին Ստամբուլի հայկական թաղամասում 87-ամյա հայ կին էր ծեծի ենթարկվել, այնուհետև` դեկտեմբերի 28-ին, դաժանորեն սպանվել էր հայ համայնքի ներկայացուցիչ մի կին՝ Մարիցա Քյուչուքը, ով դանակի 7 հարվածից սպանվել էր Սամաթիայի իր տանը, և որին հայտնաբերել էր նրա դուստրը:
Այս առնչությամբ հայտարարություններ էին տարածել թուրք հրապարակախոսներ, մտավորականներ, այդ թվում` «Ակօս» թերթի գլխավոր խմբագիր Ռոբեր Քոփթաշը: Նա Թուրքիայի ոստիկանության ուշադրությունն էր հրավիրել մի քանի հանգամանքների վրա՝ հորդորելով բացահայտել Մարիցա Քյուչուքի սպանությունը:
Թուրքիայում հայ կանանց նկատմամբ բռնությունների առնչությամբ Amnesty International միջազգային իրավապաշտպան կազմակերպությունը ևս հատուկ հայտարարություն էր տարածել՝ Թուրքիայի իշխանություններին կոչ անելով շարունակել այս հանցագործությունների հետաքննությունը և պատասխանատվության ենթարկել մեղավորներին: Սակայն դեկտեմբերի սկզբից մինչ օրս շարունակվող բռնություններին Թուրքիայի ոստիկանությունը գնահատականներ չի տալիս, իսկ համայնքի ներկայացուցիչները նրանց աշխատանքներն անբավարար են գնահատում:
«Առաջին լրատվական»-ի հետ զրույցում Ստամբուլում հրատարակվող «Ակօս» շաբաթաթերթի հայերեն բաժնի խմբագիր Բագրատ Էստուկյանը նշեց, որ պարբերաբար դիմում են Թուրքիայի ոստիկանությանը` պահանջելով ավելի հետևողական լինել, տեղեկություններ տրամադրել հանցագործությունների բացահայտման վերաբերյալ, բայց գոհացուցիչ պատասխաններ չեն ստանում, նրանք միայն ասում են, որ հետաքննություն են անցկացնում: Ուստի, նրա խոսքով, որևէ արդյունք չկա:
Ըստ Էստուկյանի՝ քանի որ երեք դեպքերն էլ կատարվել են նույն թաղամասում 80-ն անց հայ կանանց դեմ, և քանի որ հանցագործը դեռ բացահայտված չէ, ուստի Սամաթիայի տարեց հայ կանանց շրջանում խուճապ է սկսվել:
«Ոստիկանությունը վստահեցնում է, թե հետախուզում են, բայց ըստ երևույթին չեն կարողանում գտնել հանցագործին, որը խուճապի մեջ է գցում տարեց կանանց: Չեմ կարծում, թե դրանք պատահական դեպքեր են, առավել ևս, երբ տեղի են ունենում մի թաղամասում, որտեղ պատմականորեն հայեր են ապրել, և այն խաղաղ թաղամաս է եղել: Սրանք ատելության՝ հայատյացության հողի վրա իրականացված հանցագործություններ են»,- նշեց թուրքահայ լրագրողը:
Նա հիշեց, որ առաջին երկու դեպքերից հետո մամուլը սկսել էր փոքր-ինչ մոռանալ դրանք, երբ տեղի ունեցավ հերթական ոճրագործությունը, որն այսօր մամուլին ստիպել է առավել մեծ ուշադրությամբ հետևել և ուշադրության կենտրոնում պահել հանցագործությունները:
Անդրադառնալով Պոլսո Հայոց պատրիարքարանի ընդհանուր փոխանորդ Արամ արքեպիսկոպոս Աթեշյանի մեկնաբանությանը, թե` երբ Թուրքիայում թուրք է սպանվում, դա հային չեն վերագրում, Բագրատ Էստուկյանն ասաց, որ Աթեշյանը պետք է իմանար տարբերությունները՝ երբ հայ է սպանվում Թուրքիայում, և երբ թուրք է սպանվում Թուրքիայում:
«Բնական է, որ երբ հայ է սպանվում Թուրքիայում, դա ատելության արտահայտություն է, որովհետև թուրքերից շատերն ատելությամբ են լցված հայերի նկատմամբ, թեև եթե մեկ դեպք լիներ, միգուցե չխորհեինք, թե ատելության հողի վրա իրականացված բռնություն է: Իսկ երբ թուրք է սպանվում, պատճառների մասին կարելի է ավելի երկար խորհել»,- պարզաբանեց Բագրատ Էստուկյանը:
Նա նկատեց, որ թուրքերին հայերը միատարր չեն համարում` թուրքերը տարբեր են: «Թուրքերը և ազգայնամոլ են, և մարդասեր, ուստի նրանց դրսևորումներն էլ են տարբեր»,- ամփոփեց իր խոսքն Էստուկյանը՝ նկատի ունենալով այն թուրքերին, որոնք ամեն տարի հարգում են թուրքահայ մեծ մարդասեր, լրագրող, իրավապաշտպան Հրանտ Դինքին, և նրանց, ովքեր ատելությամբ են լցված հայերի նկատմամբ: