Թուրքական Miliyet թերթի հաղորդմամբ, Լիբիայի Բենղազի քաղաքում մի խումբ զինված մարդիկ հարձակում են գործել թուրքական հյուպատոսության վրա:
Լիբիացի ապստամբները նաև պահանջել են իջեցնել թուրքական դրոշը: Ապա նրանք հարձակում են գործել Թուրքիայից մարդասիրական օգնություն բերած թուրքական նավի վրա` հայտարարելով, որ Թուրքիայից իրենց ոչինչ պետք չէ:
Այս ամենը եղել է այն բանից հետո, երբ Թուրքիայի վարչապետ Էրդողանը բացեիբաց հայտարարեց, թե իրենք բացասական դիրքորոշում ունեն լիբիական ապստամբների նկատմամբ:
Հակաթուրքական ցույցեր տեղի են ունեցել նաև Թոբրուք և Դերնե քաղաքներում, ուր այրել են Թուրքիայի դրոշը:
Թուրքիայի արտգործնախարարության խոսնակ Սելչուք Ունալն այդ ամենը որակել է որպես սադրանք:
Հիշեցնենք, որ ապրիլի 2-ին` ուրբաթօրյա նամազից հետո, լիբիացի ընդդիմադիրները հավաքվել էին Բենղազիի դատարանի շենքի առջև և «հակաէրդողանյան» կոչեր հնչեցրել. «Էրդողա՛ն, մենք «Ալ Քաիդան» չենք», «Մենք ահաբեկիչ չենք, հեղափոխական ենք», «Քադաֆիի սպառազինմանը արգելք հանդիսացի՛ր»: