Համացանցի հազարավոր օգտատերեր Հնդկաստանում քննադատությունների տարափ են տեղացել ԱՄՆ նախագահ Բարաք Օբամայի գլխին, որը Նյու Դելիում հանդիսավոր զորահանդեսի ժամանակ մաստակ է ծամել։ Զորահանդեսը նվիրած է եղել գլխավոր ազգային տոներից մեկին՝ Հանրապետության օրվան։
Օբաման, որը մինչև հունվարի 27-ը պետական այցով Հնդկաստանում է, ուղիղ հեռարձակում իրականացնող հեռուստաալիքների օպերատորների կողմից ցուցադրվել է ծամոնով խոշոր պլանով, այդ թվում՝ ազգային հիմնի կատարման ժամանակ։
TASS գործակալության փոխանցմամբ՝ ոմանք նրա նման քայլը կոպիտ են անվանել։ Միջոցառմանը, որն անցկացվել է նախագահական պալատից ոչ հեռու գտնվող կենտրոնական պողոտայում, ԱՄՆ նախագահին ցուցադրել են ռուսական արտադրության տեխնիկա։
Սա առաջին անգամ չէ, որ հանդիսավոր արարողության ժամանակ Օբամային տեսնում են մաստակով։ Անցած տարվա հունիսին նա զայրացրել էր ֆրանսիացիներին՝ մաստակով ներկայանալով Նորմանդիայում դաշնակցային զորքերի վայրէջքի 70-րդ տարեդարձի պատվին պաշտոնական արարողության ժամանակ։ Այն ժամանակ հաղորդվել էր, որ Օբաման փորձում է թողնել ծխելը, այդ նպատակով հաճախ է նիկոտինային մաստակներ ծամում։
