ԼՂՀ նախկին արտգործնախարար, նախագահի թեկնածու Արման Մելիքյանը, այսօր լրագրողների հետ հանդիպման ընթացքում ամփոփելով քարոզարշավի առաջին շաբաթը, կարծիք հայտնեց, որ պարզ են դարձել թեկնածուների ընտրական մարտավարությունները, նրանց մոտեցումները սոցիալական խնդիրների լուծման ոլորտում.
«Այս ամենով հանդերձ, ցավոք սրտի, որևէ գործնական առաջարկ չհնչեց այն մասին, թե ինչպես պետք է ապահովել օրինական ընտրություններ: Ընտրարշավը կարելի է բաժանել երկու հիմնական ճամբարների: Սերժ Սարգսյանը, Հրանտ Բագրատյանը, Րաֆֆի Հովհաննիսյանը, Պարույր Հայրիկյանը իրենց խոսքի մեջ չեն նշում ընտրությունների օրինականության հարցը, կոնկրետ այդ թեկնածուները կասկածի տակ չեն դնում ընտրակեղծիքների առկայությունը: Այս թեկնածուները պարզապես աչք են փակում դրա վրա, չգիտեմ, գուցե նախորդ ընտրություննե՞րն են մոռացել»:
Ըստ թեկնածուի՝ երկրորդ խումբն էլ դիմել է ծայրահեղ քայլերի, ինչպիսին է, օրինակ, թեկնածու Անդրիաս Ղուկասյանի որոշումը՝ հացադուլ հայտարարելու վերաբերյալ.
«Ես այս քայլը արդյունավետ չեն համարում, որովհետև մի ճամբարը արդեն որոշում է կայացրել բոլորի փոխարեն:
Արամ Հարությունյանն էլ, գիտեմ, պատրաստվում էր ինքնաբացարկ հայտնել և միանալ Ղուկասյանին, սա քաղաքական հուսալքության դրսևորում է»։
Արման Մելիքյանը գիտեր, որ մարդկանց վիճակը ծանր է, բայց որ այս աստիճան՝ չէր պատկերացնում.
«Ես գիտեմ, որ շատ երկրներւոմ մարդիկ ծանր սոցիալական պայմաններում են ապրում, բայց այս աստիճան արտագաղթ չկա: Խնդիրն այն է, որ Հայաստանում մարդիկ փոփոխությունների հեռանկար չեն տեսնում»:
