Մոտ երկու ամիս է՝ «Սիվիլիթաս» հիմնադրամի հիմնադիր նախագահ, Աժ պատգամավոր Վարդան Օսկանյանի նկատմամբ հարուցված քրեական գործը կարծես փակուղի է մտել: «Հրապարակ»-ը գրում է, որ դադարել են այդ գործի շուրջ բարձրացված աղմուկն ու տարատեսակ շահարկումները: Երեկ թերթը փորձեց պրն Օսկանյանից պարզել քրեական գործի ընթացքը, սակայն նրա գրասենյակից փոխանցեցին, որ Օսկանյանը չի ցանկանում մեկնաբանություն կամ հարցազրույց տալ այդ թեմայով: ԱԱԾ լրատվականից էլ, ի պատասխան հարցման, ասացին միայն, որ գործի քննությունն ընթացքի մեջ է: Սակայն, «Հրապարակ»-ի հավաստի տեղեկություններով, Վարդան Օսկանյանի դեմ հարուցված քրեական գործի քննությունն ավարտվել է, և առաջիկա օրերին գործը կուղարկվի դատարան:
Հիշեցնենք, որ Օսկանյանի դեմ քրգործը հարուցվել էր անցած տարվա մայիսի 25-ին, իսկ հոկտեմբերի 2-ին, գլխավոր դատախազի միջնորդությամբ, նա զրկվեց պատգամավորական անձեռնմխելիությունից: Օսկանյանը մեղադրվում է հանցավոր ճանապարհով ստացված առանձնապես խոշոր չափերով՝ եկամուտներն օրինականացնելու (փողերի լվացում) համար՝ նախատեսված ՀՀ քրեական օրենսգրքի 190-րդ հոդվածի 3-րդ մասի 1-ին կետի հատկանիշներով: Հիշեցնենք նաև, որ Օսկանյանն ԱԱԾ-ի կողմից իր դեմ հարուցված քրեական գործը համարում է քաղաքական հետապնդում:
