Ներկայում Ուգո Չավեսը գտնվում է հետվիրահատական ամբողջ շրջանի լավագույն վիճակում` հայտնել է Վենեսուելայի փոխնախագահ Նիկոլաս Մադուրոն:
Չավեսը բուժվում է Հավանայում` դեկտեմբերի 11-ին քաղցկեղային հիվանդության հետևանքով կատարված վիրահատությունից հետո:
«Չավեսն արդեն բուժման նոր փուլ է մտնում, ինչի մասին կհաղորդվի մոտ օրերս»,- ասել է Մադուրոն ռուսական RT հեռուստաալիքին տված բացառիկ հարցազրույցի ժամանակ: Մադուրոն նշել է, որ երկրի կառավարությունը լիարժեք լեգիտիմություն ունի, և մոտ ժամանակներս տեղի կունենա նախագահ Չավեսի երդմնակալության արարողությունը:
Չորեքշաբթի օրը Մադուրոն հայտարարել է, որ պատրաստվում է այդ օրը նավթային և հանքարդյունաբերության նախարար Ռաֆայել Ռամիրեսի հետ մեկնել Հավանա՝ տեսնելու Չավեսին: Նա մտադիր է այնտեղից Վենեսուելայի ԱԳՆ ղեկավար Էլիաս Հաուայի հետ ուղևորվել Սանտյագո-դե-Չիլի, որտեղ շաբաթվա վերջին տեղի կունենա Լատինաամերիկյան և կարիբյան պետությունների միության (CELAC) գագաթնաժողովը, որի ընթացքում CELAC-ի նախագահությունը մեկ տարով կփոխանցվիԿուբային:
«Մենք մշտապես իրար փոխարինելով՝ նախագահի կողքին ենք»,- ասել է Մադուրոն: Նրա խոսքով՝ մի քանի օր առաջ Հավանայում է եղել նախագահի եղբայր Արխենիսը, այժմ այնտեղ են Էլիաս Հաուան և ավագ եղբայր Ադան Չավեսը, իսկ ուրբաթ օրը Հավանա կվերադառնա նախագահի փեսա Խորխե Արրեասան:
Բոլիվիայի նախագահ Էվո Մորալեսի խոսքով՝ Չավեսը հայրենիք վերադառնալուց առաջ ֆիզիոթերապիայի կուրս կանցնի: Վենեսուելայի իշխանությունները չեն ճշգրտել վերադարձի ամսաթիվը:
