Ադրբեջանի Իսմայիլի քաղաքի փողոցներում հավաքված ցուցարարները անկարգությունների ժամանակ հրդեհել են տեղի հյուրանոցի շենքը: Այս մասին հայտնում է 1news-ը:
Ըստ տեղեկությունների՝ քաղաքի բնակիչները իրենց բողոքն են արտահայտել քաղաքացիներին վիրավորող հյուրանոցի սեփականատիրոջ դեմ: Բողոքի ակցիան սկսվել է հունվարի 23-ին` Երևանի ժամանակով ժ. 23:00-ի սահմաններում: Չնայած անվտանգության ներկայությանը՝ ցուցարարներին հաջողվել է ներթափանցել հյուրանոցի տարածք: Նրանք հյուրանոցի համարներում ավերածություն են կատարել և հրդեհել շենքը:
Գործակալության փոխանցմամբ՝ հրդեհը հյուրանոցում դեռևս շարունակվում է, հրդեհվել են նաև 3 ավտոմեքենաներ (Hummer և երկու Chevrolet), որոնք պատկանում են հյուրանոցի տիրոջը:
Ցուցարարները թույլ չեն տալիս, որ դեպքի վայր մոտենան հրշեջները: Նրանց հավաստիացմամբ` հուրանոցում, իբր, «որջ» է գործում, իսկ դրա անթույլատրելիության մասին նրանց նախազգուշացումներն արհամարհվել են:
Contact.az-ն էլ հաղորդում է, որ անկարգությունների պատճառը Hummer-ի մասնակցությամբ վթարն է: Այն, իբր, պատկանում է Իսմայիլի շրջանի վարչակազմի ղեկավարի հարազատին, որը ադրբեջանցի նախարարներից մեկի որդին է:
Տեղեկություններ են հայտնվել նաև այն մասին, թե ցուցարարները հրդեհել են շրջանի ղեկավարի տանը կից շինություններից մեկը, բակում կայանված նրա մեքենան և մոտոցիկլետը և պահանջել են նրա հրաժարականը:
APA գործակալության փոխանցմամբ էլ՝ չճշտված տվյալներով, բողոքի ցույցի առիթը երկու եղբայրների (շրջանի վարչակազմի ղեկավարի ու Ադրբեջանի աշխատանքի և սոցիալական ապահովության նախարարի որդիներ) և տեղի երիտասարդության վեճն է:
Շրջանի ոստիկանապետ Նիզամի Գոջաևի խոսքով՝ անկարգությունները Ադրբեջանի հյուսիս-արևմուտքում ավարտվել են: Ոստիկանությանը հաջողվել է մարդկանց համոզել գնալ իրենց տները: Քաղաքացիների դժգոհությունը հարուցած հյուրանոցի սեփականատերը ձերբակալվել է :
Նրա խոսքով՝ անկարգությունների պատճառ է հանդիսացել մեքենայով խուլիգանությունը: Մեքենայի ղեկին հարբած վիճակով գտնվել է հյուրանոցի տերը՝ Էմիլ Շահմարդանովը:
Ոստիկանապետի խոսքով՝ նրա մեքենան բախվել է էլեկտրասյանը: Փաստի առթիվ հետաքննություն է սկսվել: Անկարգությունների ժամանակ նետված քարերից երկու մարդ է տուժել, որից մեկը՝ ոստիկան: Գոջաևի խոսքով՝ այդ օրը Ադրբեջանի աշխատանքի և սոցիալական ապահովության նախարար Ֆիզուլի Ալեկպերովի որդին ընդհանրապես այդ շրջանում չի եղել:
