«Դե Դե Տե» ռուսական ռոք խմբի առաջնորդ Յուրի Շևչուկը խոստովանել է, որ երբևէ մոտ հարաբերություններ չի ունեցել ո՛չ խորհրդային կառավարության, ո՛չ Ելցինի, ո՛չ Պուտինի հետ: Այս մասին ռոքերն ասել է Bloomberg գործակալությանը տված հրացազրույցի ժամանակ:
«Արվեստագետի տերն Աստված է, ոչ թե թագավորը»,- մեջբերել է Շևչուկն իր սիրելի ասացվածքը:
Գործակալությունը հաղորդում է, որ Հյուսիսային Ամերիկա շրջագայության շրջանակներում «Դե Դե Տե»-ն ներկայացնելու է երկու ծրագիր. հունվարի 27-ին Նյու Յորքում ցուցադրվելու է «Ինաչե» (Иначе) մեծ ծրագիրը, իսկ Տորոնտոյում և Չիկագոյում՝ «Սոլնիկ» (“Сольник”) ծրագիրը: Համերգներին բաժանվելու են երգերի թարգմանությամբ թերթիկներ:
Շևչուկի խոսքերով՝ ծրագիրը, որտեղ յուրաքանչյուր երգ ուղեկցվելու է վիդեոպրոեկցիաներով, հիշեցնելու է Pink Floyd-ի «Պատը»:
«Երգերն այն մասին են, թե ով ենք մենք, ինչպես ենք ապրում, անհատի և իշխանության միջև, անհատի և երկրի միջև, անհատի և սիրո միջև հարաբերությունների մասին են: Համլետյան հարցեր»,- ասել է Շևչուկը, որին հոդվածագիրը սանրվածքի և կլոր ակնոցների համար անվանում է «ռուս Լենոն»:
Հոդվածի հեղինակը հիշեցնում է, որ Շևչուկը վերջին երեք տարիներին այցելել է բողոքի միջոցառումների և կազմակերպել բարեգործական համերգներ՝ մարդու իրավունքներին և քաղբանտարկյալներին աջակցելու համար: Այս համերգների ընթացքում խումբը հավաքել է ավելի քան մեկ միլիոն ռուբլի: Մասնավորապես, սեպտեմբերին «Դե Դե Տե»-ն Սանկտ Պետերբուրգում մասնակցել է համերգի՝ հաջակցություն Pussy Riot-ի:
Հարցազրույցի ժամանակ Շևչուկն ասել է, որ «պանկ աղոթքը» հակասական զգացմունքներ է արթնացրել իր մեջ:
Ռոքերի խոսքերով՝ շատ մարդկանց համար եկեղեցին միակ վայրն է, որտեղ նրանք կարող են արտասվել իրենց դժվարին և նույնիսկ ողբերգական կյանքի համար: «Այլ տեղերում նրանց չեն լսում: Հասկանալի է՝ ինչու այդ մարդիկ բարկացան»,- մեկնաբանել է Շևչուկը:
Հոդվածագրի խոսքերով՝ Շևչուկը Ռուսաստանի ապագային լավատեսորեն է նայում՝ չնայած ընդդիմության դեմ ճնշումներին և կառավարության հակաարևմտյան նախաձեռնություններին:
«Ինձ դուր է գալիս այն, ինչ տեղի է ունենում երկրում: Ի հայտ է եկել երիտասարդների մի ամբողջ նոր սերունդ, որոնք չեն մտածում, որ կյանքի իմաստն անձնական հարստության մեջ է: Նրանք ցանկանում են մնալ Ռուսաստանում և այն դարձնել ավելի լավը, ավելի հարուստ, որպեսզի հպարտանան իրենց երկրով»,- եզրափակել է Շևչուկը: