Այսօր ԱԺ գյուղատնտեսական և բնապահպանական հարցերի մշտական հանձնաժողովում կազմակերպված լսումները նվիրված էին գյուղատնտեսության ոլորտում առկա հիմնախնդիրների քննարկմանը: Նիստին ներկա էր նաև ԱԺ նախագահ Հովիկ Աբրահամյանը, որը հույս հայտնեց, թե այս լսումների ընթացքում հնչած կարծիքները չեն լինի լոկ հերթական քննարկում, այլ անհապաղ և հետևողական միջոցառումների մեկնարկի ազդակ կդառնան:
Աբրահամյանը խոստովանեց, որ վերջին շրջանում մեր երկրում այս կամ այն ոլորտում անհաջողությունները պայմանավորում են համաշխարհային տնտեսական ճգնաժամով և հիմնական մեղսակից են դարձնում ճգնաժամը: Սակայն, նրա գնահատմամբ, մեր երկրում մի շարք ոլորտների և, մասնավորապես, գյուղատնտեսության անկման պատճառը ֆինանսատնտեսական ճգնաժամը չէ:
ԱԺ նախագահն առաջարկեց գյուղատնտեսության ոլորտում իրականացնել հետևյալ բարեփոխումները` հողերի խոշորացում, ցածր տոկոսադրույքներով և 5-10 տարի ժամկետով գյուղատնտեսական վարկերի տրամադրում, ոչ բարենպաստ կլիմայական գոտիներում գտնվող հողատարածքների մշակման սուբսիդավորում` մեկ հեկտարի համար 50-75 հազար դրամ, խրախուսել գյուղատնտեսական տեխնիկայի ձեռքբերումը արժեքի 20 տոկոսի չափով և այլն:
Աբրահամյանն ասաց, որ իր ներկայացրած առաջարկները գրված են «Գյուղատնտեսության զարգացումը և հիմնական պարենամթերքների ինքնաբավության մակարդակի բարձրացումը 2008-2012 թթ. զարգացման ազգային ծրագրում»: «Այստեղ շատ մանրամասն, շատ հասկանալի գրված են գյուղատնտեսության զարգացման գերակա ուղղությունները: Ես կցանկանայի լսել,- իհարկե, դա ներկայիս նախարարին չի վերաբերում,- թե ինչո՞ւ կառավարության կողմից ընդունված ազգային ծրագիրը չի իրականացվել, ի՞նչ խոչընդոտներ են եղել: Անկատարելի՞ է այս ծրագիրը, գուցե,- և ես հավատում եմ,- դրա համար կա՞ն օբյեկտիվ պատճառներ, արդեն 2011 թվականն է»,- ընդգծեց Աբրահամյանը և հավելեց, որ եթե ծրագիր պիտի ընդունեն ու չիրականացնեն, ապա ավելորդ է խոսել գյուղատնտեսության զարգացման մասին. «Հեծանիվ պետք չէ հորինել, հարկավոր է կոնկրետ քայլերով գտնել գյուղատնտեսության զարգացմանը նպաստող ուղղությունները և գնալ առաջ»:
