Կոտայքի մարզի ընդհանուր իրավասության դատարանում Յուրի Բաղդասարյանի նախագահությամբ ավարտվել է Կարեն Ա.-ի գործի դատական քննությունը:
1988 թվականին ծնված Կարենը մեղադրվել է անչափահաս՝ 1998 թվականին ծնված ու ընդամենը 15 տարին բոլորած աղջկա հետ պարբերաբար սեռական հարաբերություններ ունենալու համար:
Ըստ դատական ակտի՝ դեռ 2011 թվականին Կարենը հոր հետ առևտուր անելու նպատակով այցելել է Արարատի մարզի գյուղերից մեկը, այնտեղ հյուրընկալվել մի տանը, որտեղ տեսել է այն ժամանակ դեռ 13 տարեկան աղջկան՝ Նունեին (անունը փոխված է):
Կարենը հետագայում հոր հետ պարբերաբար այցելել է այդ տուն, շփվել է անչափահաս Նունեի հետ:
Նա աղջկան հավանել է, շուտով նրանց միջև փոխադարձ համակրանք է առաջացել:
Ըստ Կարենի՝ այդ համակրանքը շուտով վերածվել է սիրո: Նրանք փոխադարձ համաձայնությամբ ու իրենց ծնողների գիտությամբ ամուսնացել են՝ 2013 թվականի փետրվարին 24-ամյա Կարենն ամուսնացել է 15-ամյա Նունեի հետ: Աղջիկը տեղափոխվել է ամուսնու տուն:
Դատական ակտի համաձայն՝ ամեն շաբաթվա երրորդ օրը Կարենը սեռական հարաբերություն է ունեցել անչափահաս կնոջ հետ: Իսկ դեկտեմբերի վերջին նրանք դեղատնից հղիության թեսթ են գնել ու պարզել, որ մանկամարդ կինը հղի է:
2014 թվականին Նունեն երևանյան հիվանդանոցում բուժում է ստացել «հղիության 16-17 շաբաթական սպառնացող վիժում» ախտորոշմամբ: Իսկ սեպտեմբերին ծնվել է երեխան…
Ընդհանուր իրավասության դատարանում Կարենն իրեն մեղավոր է ճանաչել, հայտնել է, թե չի իմացել, որ հանցավոր արարք է կատարում: Նրա միջնորդությամբ գործը քննվել է արագացված ընթացակարգով:
Նունեն ու նրա օրինական ներկայացուցիչը՝ մայրը, հայտնել են, թե Կարենից բողոք չունեն:
Կարենը տեղեկացրել է, որ պատրաստվում է օրինական կարգով ամուսնանալ Նունեի հետ, ներկայումս իր խնամքին է մանկահասակ երեխան…
Դատարանը Կարենին մեղավոր է ճանաչել ՀՀ քրեական օրենսգրքի 141 հոդվածի 2-րդ մասի 1-ին և 3-րդ կետերով, դատապարտել է 4 տարի ազատազրկման, ապա պայմանական դատապարտության կիրառմամբ սահմանել է 2 տարի փորձաշրջան: