Այսօր Իսրայելում մեկնարկել են Քնեսեթի 19-րդ գումարման ընտրությունները, հաղորդում է Agence France-Presse-ը:
Ընտրատեղամասերը բացվել են տեղի ժամանակով ժամը 07:00-ին Իսրայելի ամբողջ տարածքում, Հորդանան գետի Արևմտյան ափի բնակավայրերում:
Վերջին սոցիոլոգիական հարցումների համաձայն՝ երկրի գործող վարչապետ Բենիամին Նեթանյահուի «Լիկուդ» դաշինքը և «Մեր տունն Իսրայելն է» կուսակցությունը նոր Քնեսեթում կարող են ստանալ 32 տեղ:
Կանխատեսումների համաձայն՝ ձախակենտրոն «Ավոդա» կուսակցությունը կստանա 17 տեղ, իսկ «Հրեական տուն» աջ կրոնական կուսակցությունը՝ 15 տեղ:
Եթե կանխատեսումներն իրականան, ապա Նեթանյահուն կարող է ստանալ 61-67 պատգամավորների աջակցությունը և ձևավորել կառավարություն: Ակնկալվում է, որ այն ավելի կոշտ քաղաքականություն կվարի պաղեստինցիների հետ բանակցությունների և Իրանի միջուկային ծրագրի հարցերում:
Քնեսեթի ընտրություններում ձայնի իրավունք ունի 5.65 միլիոն մարդ: Խորհրդարանական ընտրություններում հասարակական կարգը կպահպանեն ավելի քան 20 հազար ոստիկան:
