«Բարգավաճ Հայաստան» կուսակցության առաջնորդ Գագիկ Ծառուկյանի նախաձեռնությամբ հունվարի 20-ին կանցկացվի խորհրդաժողով՝ քաղաքական կուսակցությունների, հասարակական կազմակերպությունների և քաղաքացիական նախաձեռնությունների մասնակցությամբ:
Խորհրդաժողովին մասնակցելու հրավեր հիմնականում ստացել են բոլոր այն կուսակցությունները, որոնք մինչ այժմ եռյակին և ավելի կոնկրետ՝ «Բարգավաճ Հայաստան»-ին սատարելու պատրաստակամություն են հայտնել:
«Առաջին լրատվական»-ի հետ զրույցում Ժողովրդական կուսակցության նախագահ Տիգրան Կարապետյանն ասաց, որ իրեն հրավիրել են մասնակցելու խորհրդաժողովին, և որ ինքն անպայման գնալու է:
Մեր այն հարցին, թե ինքը նախկինում կողմ էր հանրահավաքային պայքարին, ինչո՞ւ որոշեց մասնակցել դահլիճային մակարդակի միջոցառմանը, Կարապետյանը պատասխանեց. «Կլինի, հանրահավաք էլ կլինի»:
Հետաքրքրվեցինք նաև, թե ի՞նչ ակնկալիք ունի խորհրդաժողովից, Տիգրան Կարապետյանը պատասխանեց. «Առաջարկելու ենք, որ համաժողովրդական շարժումը լիդեր ընտրի՝ դա անձամբ իմ առաջարկն է: Այդ լիդերը պետք է լինի Ծառուկյանը»:
Մեր զրուցակցի կարծիքով՝ միակ անձնավորությունը Ծառուկյանն է, որ բացի փողից՝ մտածում է նաև ժողովրդի մասին: «Չեմ ասում՝ բիզնես չունի, չեմ ասում՝ սուրբ է, բայց եղածներից ամենալավն է»,- ասաց Կարապետյանը:
«Ազգային անվտանգություն» կուսակցության առաջնորդ Գառնիկ Իսագուլյանը ևս «Առաջին լրատվական»-ի հետ զրույցում ասաց, որ մասնակցելու է խորհրդաժողովին. «Մենք հենց առաջին օրվանից հայտարարել ենք, որ ընդունում ենք հրավերը և կոնկրետ առաջարկություններով կմասնակցենք խորհրդաժողովին»,- ընդգծեց նա:
«Ազատամարտիկների դաշինքը» ևս խորհրդաժողովին մասնակցելու հրավեր է ստացել՝ «Առաջին լրատվական»-ի հետ զրույցում հաստատեց դաշինքի անդամ Սուրեն Սարգսյանը: Նա ընդգծեց, որ համաժողովին անպայման մասնակցելու են, իսկ թե ինչ ֆորմատով՝ կորոշեն առաջիկայում կայանալիք վարչության նիստում:
«Բարգավաճ Հայաստան» կուսակցության պատգամավոր Գուրգեն Արսենյանի ղեկավարած ՄԱԿ կուսակցության փորձագետ, Լոռու նախկին մարզպետ Վիգեն Խաչատրյանը մեզ հետ զրույցում ասաց, որ ողջունում է ցանկացած տեսակի քննարկում, բայց կոնկրետ այս խորհրդաժողովի վերաբերյալ որևէ տեղեկություն չունի: Մեր այն հարցին, թե երկու բուռն հանրահավաքներից հետո դահլիճային մակարդակով քննարկումներ անցկացնելը հիասթափեցնող չէ՞, Խաչատրյանը պատասխանեց. «Թող հիասթափվեն նրանք, ովքեր ոգևորված էին, ես արդեն վաղուց ոգևորված չեմ»։
Հասկանալի է, որ եռյակի մաս կազմող ուժերն այս խորհրդաժողովին չեն ներկայանա առաջին դեմքերի մակարդակով: Հայ ազգային կոնգրեսն իր հայտարարության մեջ արդեն իսկ ակնարկում է այս մասին, իսկ «Ժառանգություն» կուսակցության փոխնախագահ Արմեն Մարտիրոսյանն «Առաջին լրատվական»-ի հետ զրույցում ասաց, որ չի կարծում, թե Րաֆֆի Հովհաննիսյանը կմասնակցի խորհրդաժողովին. «Ընդհանրապես մենք այդ հարցը դեռ չենք քննարկել, բայց կարծում եմ՝ ցանկացած դեպքում մասնակցություն կունենանք, դեռ պետք է հստակեցվի, թե համաժողովի օրակարգը որն է: Չեմ կարծում, թե Րաֆֆի Հովհաննիսյանը կմասնակցի, բայց մենք կմասնակցենք և մեր առաջարկությունները կներկայացնենք»,-եզրափակեց նա:
«Համաժողովրդական շարժմանն» աջակցողների թիվն այսքանով չի սահմանափակվում: Շատերն են եռյակին միանալու ցանկություն հայտնել՝ ընդգծելով, որ իշխանափոխություն այս երկրում կարող է իրականացնել միայն Գագիկ Ծառուկյանը՝ իր խելքով, համբավով և շնորհքով:
Ուշագրավ է, որ այս «շարժման» մեջ կան կուսակցություններ՝ թեկուզև մարդ-կուսակցություններ, որոնք եղել են նաև 2008 թվականի շարժման մեջ, երբ շարժումն ուներ թե՛ հանրության լայն շերտերի, թե՛ մտավորականների և թե՛ մամուլի աննախադեպ աջակցությունը, որն, անխոս, անհամեմատելի է այն ամենի հետ, ինչ այսօր է տեղի ունենում Ազատության հրապարակում և մասնավոր դահլիճներում:
