1935 թվականի հունվարի 8-ին Տյուպելոյում (ԱՄՆ Միսիսիպի նահանգ) ծնվել է ռոք-ն-ռոլի արքա Էլվիս Աարոն Փրեսլին: Երգչի իր կարիերան տղան սկսել է եկեղեցական երգչախմբում և արդեն 10 տարեկանում ստացել իր առաջին մրցանակը` ժողովրդական երգի կատարման համար:
Դպրոցն ավարտելուց հետո նա աշխատել է որպես բեռնատարի վարորդ՝ չմոռանալով, սակայն, իր նախասիրությունը: Էլվիսը սկավառակի վրա ձայնագրել է մի քանի երգ՝ որպես նվեր մորը: Իսկ մեկ տարի անց թողարկվել է That’s all right նրա առաջին սինգլը՝ 20 հազար օրինակով: Էլվիս Փրեսլիի, Սքոթի Մուրի և Բիլլ Բլեքի ստեղծած նոր երաժշտական ոճը, ավելի շուտ՝ տարբեր ոճերի խառնուրդը, հետագայում ստացավ «ռոք-ն-ռոլ» անվանումը:
1956 թվականը Էլվիսին բերեց համաշխարհային հռչակ: Նրա Heartbreak Hotel սինգլը ուներ միլիոնից ավելի օրինակ: Փրեսլին դարձավ դեռահասների ու երիտասարդների կուռքը:
Սակայն 1973-ից հետո նրա մոտ առաջ եկան առողջական խնդիրներ, նա ունեցավ դեղորայքային կախվածություն, իսկ 1977-ի օգոստոսի 16-ին Էլվիս Փրեսլին մահացավ իր առանձնատանը: