ՀՀ նախագահի թեկնածու Հրանտ Բագրատյանի հայտարարագրի վերաբերյալ «Առաջին լրատվական»-ի 20.01.2013թ. հրապարակման մեջ տեղի է ունեցել թյուրիմացություն՝ խորհրդարանական ընտրությունների ժամանակ ներկայացված հայտարարագրում 2012թ. մարտի 1-ի դրությամբ առկա 27 հազար 200 եվրո գումարով բանկային հաշվեհամարը ներկայացվել է որպես նոր: Սակայն նախագահական ընտրությունների կապակցությամբ ներկայացված հայտարարագրում 2013թ. հունվարի 1-ի դրությամբ այն բացակայում է:
Հրանտ Բագրատյանի նախընտրական շտաբն այսօր տեղեկատվություն է տարածել, համաձայն որի` հրապարակվածը սխալ տեղեկատվություն է.
«2012թ. ապրիլին Հրանտ Բագրատյանը խորհրդարանական ընտրություններից առաջ ներկայացրել է հայտարարագիր, ըստ որի` նրա խնայողությունները կազմել են 63 հազար դոլար և 27 հազար 200 եվրո: Այս՝ 2013թ. նախագահական ընտրությունների համար որպես թեկնածու առաջադրված Հրանտ Բագրատյանը ներկայացրել է հայտարարագիր, համաձայն որի` թեկնածուի դրամական միջոցները հայտարարագիրը ներկայացնելու օրվա դրությամբ կազմում են 65 հազար դոլար (տես՝ elections.am կայքի համապատասխան բաժինը): Հրանտ Բագրատյանը նոր հաշվեհամար չի բացել, և, դժբախտաբար, նախկինում հայտարարագրված 27 հազար 200 եվրոն այդ ժամանակամիջոցում ծախսվել է: Այսպիսով, լրատվամիջոցի կողմից բերված տեղեկությունները` Հրանտ Բագրատյանի խնայողությունների աճի մասին, ոչ միայն չեն համապատասխանում իրականությանը, այլև տեղի է ունեցել ճիշտ հակառակը: ՀՀ նախագահի թեկնածու Հրանտ Բագրատյանի նախընտրական շտաբը պահանջում է հերքում հրապարակել և ակնկալում է, որ հետայսու այս պատասխանատու օրերին լրատվամիջոցը օբյեկտիվություն կցուցաբերի»:
Հ.Գ. Նշենք, որ այս թյուրիմացությունը տեղի է ունեցել ոչ միտումնավոր, և «Առաջին լրատվական»-ը թեկնածուի հայտարարագրում որևէ բան փոփոխելու հատուկ նպատակ չի ունեցել: