«Այս պահին հանգիստ է, բայց ճիշտ է՝ երկու օր շատ անհանգիստ է եղել: Վերջին կրակոցները մի քանի ժամ առաջ են եղել»,- «Առաջին լրատվական»-ի հետ զրույցում ասաց Տավուշի մարզի Բարեկամավանի գյուղապետ Գագիկ Աբազյանը՝ անդրադառնալով վերջին օրերին ադրբեջանական կողմից հնչող կրակոցներին:
Իսկ վերջին երկու օրերին Բարեկամավանն անընդհատ գտնվել է Ադրբեջանի կողմից ուղղված կրակահերթի տակ: «Անցած տարվա հուլիս-օգոստոսյան դեպքերից հետո առաջին անգամ է, որ նման լարվածություն է լինում»,- ավելացնում է Բարեկամավանի գյուղապետը:
Նրա խոսքերով՝ կրակել են մեծ տրամաչափի զենքերից, և հիմնականում լարված է եղել անցած գիշերը: «Ճիշտն ասած՝ չգիտեմ, թե ինչ զենքից են կրակում: Կրակած սնարյադից մի կտոր մոտս կա: ДШК-ից մեծ է, բայց գրադի չափ չկա: Եվ որտեղ որ ընկել է, տեղում խփել է, ու պայթյունը շատ ուժեղ է եղել: Տրաքել է, ասկոլկա է տվել և մոտակա պատի երեսը քանդել: Մեկն էլ ընկել է տան մեջ, վնասներ է տվել, բայց էդ տանը մարդ չի եղել, տերերը Ռուսաստանում են»,- ասում է նա:
Գյուղապետն ասում է, որ Բարեկամավանի բնակիչները հիմա շատ զգույշ են, իսկ ով այդ կրակոցներից շատ է վախեցել, առայժմ հեռացել է գյուղից: «Կրակոցները մեզ համար սովորական բան են դարձել, բայց երեկվանն ուրիշ էր, ուժեղ էր: Մի քանի տարի է՝ այդպիսի կրակոց չենք ունեցել: Բայց մեր մոտից ակտիվ պատասխան եղավ, նոր իրենք դադարեցրին»,- ասում է Գ. Աբազյանը:
Գյուղապետի խոսքերով՝ Բարեկամավանը թեև փոքր գյուղ է, բայց Ադրբեջանի հետ ունի 17-18 կիլոմետր սահման: Սահմանից այն կողմ ադրբեջանական Ղազախի շրջանի երեք գյուղեր են, որոնց մոտակայքից էլ Բարեկամավանի վրա են կրակում: Եվ կրակելու դեպքում էլ ստանում են պատասխան կրակոցները: Իսկ Բարեկամավանն ունի 250 բնակիչ: «Հուլիս-օգոստոսյան դեպքերից հետո 10 աշակերտ դուրս եկան գյուղից, և մեր դպրոցում 33 աշակերտից 23-ն են մնացել: Մինչդեռ դպրոցը ժամանակին ունցել է 330 աշակերտ: Ես գոհ եմ, որ 23 աշակերտի համար պետությունը դպրոց է պահում: Դա շատ կարևոր է մեզ համար: Դպրոցը փակեցին, այս դարպասը կքանդվի: Եթե սահմանի հետևը բնակչություն չլինի, սահման պահելը դժվար կլինի: Ասեմ նաև, որ պաշտպանության նախարարը շատ ուշադիր է գյուղի նկատմամբ, շատ է մտահոգվում, հաճախ է գյուղ գալիս»,- ասում է գյուղապետը:
Վերջինս դեռ չգիտի, թե տարեվերջին Ազգային ժողովի կողմից ընդունված սահմանամերձ գյուղերի արտոնությունների մասին օրենսդրական փաթեթն ինչ կարող է տալ Բարեկամավանին: Օրենքը նոր է սկսել գործել, և գյուղը դեռ դրա հնարավորությունները չի զգացել: Առայժմ նրանց համար զգալի է այն հանգամանքը, որ պաշտպանության նախարարությունը հոգում է էլեկտրաէներգիայի ծախսերը:
