Գնահատելով Րաֆֆի Հովհաննիսյանի հացադուլի ազդեցությունը «Ժառանգության» վարկանիշի վրա, Հայաստանի սոցիոլոգիական ասոցիացիայի նախագահ Գևորգ Պողոսյանը նշեց, որ հացադուլից հետո դեռևս սոցիոլոգիական հետազոտություններ չեն կատարվել, որպեսզի հնարավոր լիներ տեսնել դրա ազդեցության մակարդակը:
«Առաջին լրատվականի» հետ զրույցում Պողոսյանը կարծիք հայտնեց, որ եթե անգամ ինչ-որ ազդեցություն եղել է, ապա դա ավելի շատ ազդել է Րաֆֆի Հովհաննիսյանի անձնական վարկանիշի վրա, ոչ թե կուսակցության: Պողոսյանը հիշեց, որ շատերը Ր. Հովհաննիսյանի հացադուլը դիտարկում էին որպես PR ակցիա: Նրա դիտարկմամբ, դա պայմանավորված էր նրանով, որ սկզբում Հովհաննիսյանի նպատակները պարզ ու հստակ չէին, հացադուլից դուրս գալը ևս անհասկանալի էր, քանզի նա չհասավ այն նպատակներին, որոնք դրել էր իր առջև:
Պողոսյանը հիշեցրեց, որ իրենց վերջին հետազոտություններով, «Ժառանգություն» կուսակցությունը գտնվում է 6-7-րդ տեղում, իսկ առաջատարներն են ՀՀԿ-ն և ԲՀԿ-ն` իշխանական դաշտից, ընդդիմադիր դաշտից` ՀԱԿ-ը:
