Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում, դատավոր Գագիկ Պողոսյանի նախագահությամբ, տեղի ունեցավ ՀՀ քաղաքագետների միության նախագահ Հմայակ Հովհաննիսյանի դեմ հարուցված քրեական գործի դատաքննության առաջին նիստը:
Նիստի մեկնարկին Հմայակ Հովհաննիսյանի պաշտպան Ղազարյանը դատավորին ինքնաբացարկ ներկայացրեց: Նա կասկած հայտնեց դատավորի կողմնակալության մասին: Իր միջնորդությունը պաշտպանը հիմնավորեց մի քանի հանգամանքներով, որոնցից մեկն այն է, որ դատավորն անցել է դատաքննության փուլին՝ հաշվի չառնելով, որ մեղադրական եզրակացությունը չի համապատասխանում քրեական օրենսգրքի պահանջներին:
Դատավորի հարցին, թե միակարծի՞ք են պաշտպանը և ինքը, Հ. Հովհաննիսյանը պատասխանեց, որ այս քրեական գործը համարում է իր նկատմամբ քաղաքական հալածանք: «Քննությունը մինչև վերջ չի իրականացվել, թեև եղել են միջնորդություններ: Գործը ծայրից ծայր շինծու է, իսկ ձեր կողմնակալ վերաբերմունքն ակնհայտ է նրանով, որ գործում կարևոր վկաներ չեն ներգրավվել: Սա մի խայտառակ գործ է, որն արտացոլում է դատաիրավական համակարգի թերիությունը: Կոչ եմ անում ընդունել, որ կողմնակալ եք»,- դիմեց դատավոր Պողոսյանին ամբաստանյալի աթոռին նստած Հմայակ Հովհաննիսյանը:
Դատախազ Հայկ Էյամջյանն իր հերթին անդրադարձավ միջնորդությանը՝ այն հիմնազուրկ անվանելով: Իսկ տուժող Սենիկ Ջուլհակյանը, խոսելով Հմայակ Հովհաննիսյանի դիտարկումներից, նշեց, որ նրա նկատմամբ քաղաքական հետապնդում չկա:
Դատավոր Գ. Պողոսյանը հեռացավ խորհրդակցական սենյակ, և մոտավորապես կես ժամ միջնորդությունը քննության առնելուց հետո վերադառնալով նիստի դահլիճ՝ հայտարարեց, որ հաշվի առնելով այն, որ պաշտպանի հիմնավորումներն անհիմն են, որոշում է կայացվել մերժել ինքնաբացարկի միջնորդությունը:
Դատավորը մի շարք կենսագրական տեղեկություններ պարզելուց հետո պաշտպանից հետաքրքրվեց՝ արդյոք չունի՞ միջնորդություններ: Պաշտպան Ղազարյանն ասաց, որ բացարկի միջնորդություն է ցանկանում ներկայացնել դատախազ Հայկ Էյամջյանին: Ըստ պաշտպանի՝ դատախազի կողմից խախտվել են քրեական դատավարության մի շարք պահանջներ: Տեխնիկական խնդիրներով պայմանավորված՝ պաշտպանը բանավոր չկարողացավ ներկայացնել միջնորդությունն ամբողջությամբ, ուստի խնդրեց տրամադրել տասը րոպե խնդիրները լուծելու և միջնորդությունը գրավոր տեսքով ներկայացնելու համար: Ի պատասխան՝ դատավորը որոշեց հետաձգել նիստը՝ ժամը 12.00-ին այլ նիստ ունենալու պատճառով: Պաշտպանից խնդրեց մինչև մյուս նիստը միջնորդությունը գրավոր տեսքով ներկայացնել նաև դատախազ Հայկ Էյամջյանին:
Հաջորդ դատական նիստը նշանակվեց փետրվարի 11-ին՝ ժամը 10.30:
Նշենք, որ առաջին միջնորդության քննության ընթացքում դատարանի դահլիճից դուրս թեժ խոսակցություններ և քննարկումներ ծավալվեցին տուժողի և ամբաստանյալի միջև, որոնցից յուրաքանչյուրը գործի իր վարկածն էր ներկայացնում և փորձում ապացուցել իր իրավացիությունը: Ներկա էր նաև «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանն, որը կողմերին հորդորում էր պահպանել հանգստություն: Նրա համոզմամբ՝ այս գործը քրեական բնույթ չունի և հանցակազմ չկա, որի հիման վրա այս գործը սկսվել է:
Հիշեցնենք, որ Հմայակ Հովհաննիսյանը մեղադրվում է 2012 թ. ապրիլի 21-ին «Հայհիդրոէներգանախագիծ»-ի մուտքի մոտ ինստիտուտի մի շարք աշխատակիցների հետ վիճելու արդյունքում աշխատակից Սենիկ Ջուլհակյանին միջին ծանրության՝ ձեռքի 3-րդ և 5-րդ մատները կոտրելու, վնասվածք հասցնելու մեջ: