Այսօր՝ հունվարի 21-ին, մեկնարկել է նախագահական ընտրությունների պաշտոնական քարոզարշավը, որը կտևի մինչև փետրվարի 16-ը: Փետրվարի 17-ին լռության օր է: Ընտրությունները կանցկացվեն փետրվարի 18-ին:
Նշենք, որ ՀՀ նախագահի պաշտոնի համար պայքարում է ութ թեկնածու՝ ՀՀԿ առաջնորդ, ՀՀ գործող նախագահ Սերժ Սարգսյանը,
«Ազատություն» կուսակցության նախագահ Հրանտ Բագրատյանը, ԱԻՄ առաջնորդ Պարույր Հայրիկյանը, «Ժառանգություն» կուսակցության նախագահ Րաֆֆի Հովհաննիսյանը, ԼՂՀ նախկին ԱԳ նախարար Արման Մելիքյանը, «Ազգային համաձայնություն» կուսակցության նախագահ Արամ Հարությունյանը, էպոսագետ, անկուսակցական Վարդան Սեդրակյանը, «Ռադիո Հայ» ընկերության տնօրեն, քաղաքագետ Անդրիաս Ղուկասյանը:
Ընտրական օրենսգրքի համաձայն` թեկնածուները կարող են օգտագործել 60 րոպե ավճար եթերաժամանակ Հանրային հեռուստատեսությունում, 120 րոպե` հանրային ռադիոյում:
Հայտնի է, որ այսօր Սերժ Սարգսյանի քարոզարաշավի առաջին հանդիպումը տեղի կունենա Ավան վարչական շրջանում, Րաֆֆի Հովհաննիսյանը ընտրողների հետ հանդիպում կունենա Ա. Խաչատրյանի արձանին հարող տարածքում, իսկ քաղաքագետ Անդրիաս Ղուկասյանը այսօրվանից հայտարարում է հացադուլ: