Հունվարի 16-ին «Կարետնի դվոր» ռեստորանից դուրս գալիս սպանված քրեական հեղինակություն Ասլան Ուսոյանի (Դեդ Հասանի) հուղարկավորության տեղն ու ժամը դեռևս հայտնի չէ: Վրաստանում մեծացած ազգությամբ եզդի կրիմինալ կայսրության ղեկավարի դին Վրաստանի օդանավակայանը հրաժարվել էր ընդունել: Սպանվածի աճյունով ինքնաթիռը ստիպված էր եղել վերադառնալ Դոնեցկ: Այժմ Ուսոյանի մոսկովյան բարեկամներն ու ընտանիքը քննարկվում են նրան հուղարկավորելու տեղի-ժամի հարցը:
Ինչպես «Առաջին լրատվական»-ի հետ զրույցում ասաց Ասլան Ուսոյանի հորեղբոր որդի Ալիկ Ասլանյանը, Դեդի հայաստանյան բարեկամները սպասում են նրա ընտանիքի որոշմանը հուղարկավորության արարողությանը մասնակցելու համար: Ըստ նրա՝ հուղարկավորության վայրի երկու տարբերակ է քննարկվում: «Նրա հարազատները ուզում էին Վրաստանում հուղարկավորել, այնտեղ Սաակաշվիլին թույլ չտվեց, մեծ հավանականություն կա, որ կամ Մոսկվայում, կամ Հայաստանում կհուղարկավորեն: Նրա հարազատների շրջանում ցանկություն կա նրան հուղարկավորել Հայաստանում՝ եզդի Ճակոյի կողքին, սակայն դա իրենք պետք է որոշեն և սկսեն բանակցություններ վարել ՀՀ իշխանությունների հետ նրա դին Հայաստան տեղափոխելու համար»,- մանրամասնեց Ալիկ Ասլանյանը՝ շարունակելով, որ Դեդ Հասանի Հայաստանի բարեկամները ցանկանում են, որ նա Հայաստանում հուղարկավորվի: Ասլանյանի փոխանցմամբ՝ մինչ երեկո հայտնի կդառնա, թե ինչպես և որտեղ է կազմակերպվելու հուղարկավորությունը:
Աշխարհի եզդիների միության նախագահ Ազիզ Թամոյանը «Առաջին լրատվական»-ի հետ զրույցում տեղեկացրեց, որ ինքը ևս սպասում Ասլան Ուսոյանի ընտանիքի որոշմանը ՀՀ իշխանությունների հետ բանակցություններ սկսելու՝ նրա դին Հայաստանում հուղարկավորելու թույլտվություն ստանալու համար: «Եթե ընտանիքը համաձայն է, ես կխնդրեմ իշխանությունից՝ ՀՀ նախագահի աշխատակազմից կամ ԱԳՆ-ից, բայց այսօր շաբաթ է, վաղը՝ կիրակի, սա դժվարություն է ստեղծում: Դժվարություն է նաև այն, որ կարող է չհամաձայնվեն, որ այդքան մեծ թվով «օրենքով գող» մտնի Հայաստան»,- նշեց Ազիզ Թամոյանը:
Նա տեղեկացրեց, որ Ասլան Ուսոյանի բարեկամությունը Հայաստանում գերեզմաններ ունի, Հայաստանում՝ Զեյթունի գերեզմանատանն է թաղված նրա հորեղբոր որդի եզդի Ճակոն: Նա նաև հիշեց, որ ԽՍՀՄ տարիներին բազմիցս է հանդիպել Ասլան Ուսոյանին. «Հայրենասեր, ուտող-խմող տղա էր, անընդհատ երգում էր՝ «Ես եզդի եմ», սիրում էր եզդի ազգը»:
Հիշեցնենք, որ օրեր առաջ մահացու հրազենային վնասվածքներից հիվանդանոցում մահացել է քրեական հեղինակություն Ասլան Ուսոյանը: Ուսոյանի ուղղությամբ մի քանի փամփուշտներ էին արձակվել Մոսկվայի կենտրոնում՝ Պովարսկայա փողոցի վրա գտնվող ռեստորանի մոտ: Տեղեկություններ էին պտտվում այն մասին, որ դիպուկահարը արձակել է զրահածակող փամփուշտներ: Սա վերջին տարիներին նրա դեմ իրականացված երկրորդ մահափորձն էր:
Նշենք, որ Դեդ Հասանի ծնողները ծնվել են Ապարանում, նա բարեկամներ ունի Հայաստանի եզդիների շրջանում, մտերիմ է եղել նաև հայ «օրենքով գող» Սվո Ռաֆի հետ:
