CNN TÜRK-ը հաղորդում է, որ այսօր Թուրքիա է ժամանում ՆԱՏՕ-ի գլխավոր քարտուղար Անդերս Ֆոգ Ռասմուսսենը: Վերջինիս այցը նախորդել է ապրիլի 14-15-ը Բեռլինում կայանալիք ՆԱՏՕ-ի անդամ երկրների արտգործնախարարների համաժողովին:
Նշվում է, որ Ռասմուսսենը Թուրքիայում հանդիպումներ է ունենալու վարչապետ Էրդողանի, արտգործնախարար Ահմեդ Դավութօղլուի և պաշտպանության նախարար Մեհմեդ Վեջդի Գյոնյուլի հետ:
Հանդիպումների ժամանակ կողմերը քննարկելու են լիբիական խնդիրը, Աֆղանստանում ուրբաթ օրը ՄԱԿ-ի գրասենյակի վրա իրականացված հարձակումը, Թուրքիայում հակահրթիառային պաշտպանության համակարգի տեղակայման խնդիրը և ԵՄ-ՆԱՏՕ հարաբերությունները:
Հիշեցնենք, որ նախորդ տարվա հոկտեմբերի սկզբին, ավելի քան երեսնամյա ընդմիջումից հետո, ՆԱՏՕ-ի գլխավոր քարտուղարի տեղակալ է դարձել թուրք դիվանագետը` Թուրքիայի նախագահի արտաքին հարցերով գլխավոր խորհրդական (արդեն նախկին) Հյուսեին Դիրիյոզը:
