Ադրբեջանի գլխավոր դատախազության աշխատակիցները խուզարկություն են կատարում «Ազատություն» ռադիոկայանի ադրբեջանական ծառայության Բաքվի բյուրոյում: Այս մասին հայտնում է APA-ն:
Բյուրոյի աշխատակիցներից պահանջել են լքել գրասենյակը: Ավելի վաղ նրանց մի քանի ժամ պահել են բյուրոյի շենքերից մեկում: Նրանց արգելվել է օգտվել հեռախոսներից և համակարգիչներից:
Խուզարկությանը մասնակցում են ընթերականեր, որոնց իրենց հետ տարել են դատախազության ներկայացուցիչները: Գլխավոր դատախազության աշխատակիցները պահանջել են բացել չհրկիզվող պահարանը, որտեղ պահվում են կազմակերպության փաստաթղթերը և սպառնացել են բռնագրավել համակարգիչները: Նրանք հայտարարել են, որ հետաքննչական միջոցառումներն իրականացվում են «Ազատություն» ռադիոկայանի, որպես արտասահմանից ֆինանսավորվող կոմերցիոն կազմակերպություն, գործունեության հետաքննության շրջանակներում:
Ադրբեջանի գլխավոր դատախազության մամլո ծառայության ղեկավար Էլդար Սուլթանովն APA-ին ասել է, որ խուզարկությունը կապված է քրեական գործի հետ, որը քննում է Ադրբեջանի գլխավոր դատախազության Առանձնապես ծանր հանցագործությունների հետաքննչական վարչությունը:
3 շաբաթ առաջ Բաքվում ձերբակալվել է «Ազատություն» ռադիոկայանի լրագրող Խադիջա Իսմայլովան: Նա մեղադրվում է ռադիոկայանի նախկին աշխատակցին ինքնասպանության փորձի հասցնելու մեջ: Իսմայլովան հերքում է իրեն առաջադրված մեղադրանքները և դրանք համարում քաղաքականապես մոտիվացված:
Նշվում է, որ վերջին ամիսներին Ադրբեջանի իրավապահ մարմինները նման ռեյդեր անցկացրել են IREX, Oxfam ոչ կոմերցիոն կազմակերպությունների և Ժողովրդավարության ազգային ինստիտուտի գրասենյակներում: Այդ 3 կազմակերպությունները փակվել են:
