Ադրբեջանական Trend.az կայքի հաղորդմամբ, Հունաստանի նախագահ Կարոլոս Պապուլյասն ապրիլի 4-6-ը Ադրբեջան կատարելիք իր այցից առաջ հարցազրույց է տվել ադրբեջանական լրատվամիջոցներին` անդրադառնալով հույն-ադրբեջանական երկկողմանի հարաբերությունների խնդրին.
«Ադրբեջանի անկախացումից անմիջապես հետո Հունաստանը ճանաչել է այդ երկիրը և առաջիններից մեկն է դեսպանատուն բացել Բաքվում:
Երկու տարի առաջ Աթենք այցելեց Ադրբեջանի նախագահ Իլհամ Ալիևը: Այդ այցը շատ հաջող էր, քանի որ ստորագրվեցին երկկողմանի համագործակցության շուրջ մի շարք կարևոր համաձայնագրեր: Հենց այդ ժամանակ էլ ես ընդունեցի պատասխան այց ձեռնարկելու Ալիևի հրավերը:
Հունաստանը մեծապես շահագրգռված է կովկասյան տարածաշրջանով, ինչն ակնառու էր ոչ վաղ անցյալում ԵԱՀԿ-ում, ինչպես նաև 2003 թվականին ԵՄ-ում մեր նախագահության ժամանակաշրջաններում: Հունաստանը` որպես ԵՄ-ի անդամ երկիր, պատրաստ է նպաստել Ադրբեջանի եվրաինտեգրմանը:
2007 թվականից սկսած` Հունաստանը «Թուրքիա-Հունաստան-Իտալիա» (ITGI) գազատարի հունական հատվածով ներկրում է ադրբեջանական գազը: Այժմ Հունաստանի ներքին էներգետիկ սպառման ոլորտում գազի կշիռն աճել է` հասնելով 11 տոկոսի: Այն շարունակում է աճել:
Ադրբեջանական գազը հունական շուկայում կազմում է 20 տոկոս: 2020 թվականի դրությամբ` Հունաստանի գազային պահանջարկը կգերազանցի 6.5 միլիարդ խորանարդ մետրը: Ներկայումս այն կազմում է 3.5 միլիարդ խորանարդ մետր: Դրա համար էլ պլանավորված է ընդլայնել ITGI գազատարի տարեկան թողունակությունը` այն հասցնելով տարեկան մինչև 11.8 միլիարդ խորանարդ մետրի»:
Հիշեցնենք, որ ներկայումս Ադրբեջանը «Բաքու-Թբիլիսի-Էրզրում» գազատարով, ապա նաև ITGI-ով Հունաստանին մատակարարում է տարեկան 700 միլիոն խորանարդ մետր գազ:
