Վրացական Apsny.ge կայքի հաղորդմամբ, Վրաստանի մայրաքաղաք Թբիլիսիում բացվել է Շվեդիայի դեսպանատուն, որի բացման արարողությանը ներկա են գտնվել Շվեդիայի արտգործնախարար Կառլ Բիլդտը և Վրաստանի կառավարության ու դիվանագիտական կորպուսի ներկայացուցիչները:
Իր ելույթում Բիլդտը գոհունակություն է հայտնել Թբիլիսիում իր երկրի դիվանագիտական ներկայացուցչության բացման կապակցությամբ և հույս հայտնել, որ դեսպանատունը կնպաստի երկու երկրների հարաբերությունների զարգացմանը.
«Մենք պետք է համատեղ բազմաթիվ քայլեր կատարենք Վրաստանի ժողովրդավարական զարգացման, տնտեսական բարեփոխումների ու տարածքային ամբողջականության ուղղությամբ։ Վրաստանը զարգանում է արագ տեմպերով` փորձելով անդամակցել ԵՄ-ին: Շվեդիան պատրաստ է նպաստել դրան»:
Հիշեցնենք, որ Վրաստանը Շվեդիայի հետ դիվանագիտական հարաբերություններ է հաստատել 1992 թվականին: Նախորդ տարվա դեկտեմբերին կնքված վրաց-շվեդական համաձայնագրով, Շվեդիան մինչև 2013 թվականը Վրաստանի զարգացմանը տրամադրելու է 480 միլիոն շվեդական կրոն (մոտ 51 միլիոն եվրո)։
