Ըստ վրացական Apsny.ge կայքի՝ Վրաստանի նախագահ Միխեիլ Սաակաշվիլին սուր քննադատության է ենթարկել վրացական արմատական քաղաքական ուժերին.
«Ներկայումս շարունակվում են երկրի ընտրական համակարգի շուրջ քաղաքական դեբատները: Մի շարք արմատական կուսակցություններ պահանջում են, որ շրջանները զրկվեն վրացական խորհրդարանում իրենց ներկայացուցիչն ունենալուց: Նրանց կարծիքով, կուսակցությունները Թբիլիսիում պետք է որոշեն, թե ովքեր կլինեն իրենց ներկայացուցիչները խորհրդարանում:
Ժամանակին ես եղել եմ Թբիլիսիի կենտրոնից ներկայացված մեծամասնական պատգամավոր և հստակ գիտեմ, որ հաշվետու եմ եղել ոչ թե իմ կուսակցական առաջնորդների, այլ իրենց քվեն ինձ տված անձանց առջև: Եվ եթե ես չկատարեի նրանց առաջադրանքները, ապա հաջորդ ընտրությունների ժամանակ կվտարվեի Վրաստանի խորհրդարանից:
Այն կուսակցությունները, որոնք մեզ այդպիսի առաջարկ են անում, թույլ են, նրանց ընդհանրապես չի հետաքրքրում ժողովրդի կարծիքը, դրա համար էլ չեն վայելում ժողովրդի աջակցությունը: Կուսակցությունները դա բացատրում են նրանով, թե իրենք այնքան «հանճարեղ» են, որ ժողովրդի մակարդակը թույլ չի տալիս իրենց հասկանալ»:
Հիշեցնենք, որ Վրաստանի խորհրդարանն ունի 150 անդամ, որոնց կեսն ընտրվում են ընտրացուցակներով, իսկ մյուս կեսը` միամանդատ շրջաններից: Պատգամավորների լիազորությունների ժամկետը սահմանված է 4 տարի: Հերթական խորհրդարանական ընտրությունները տեղի են ունենալու 2012 թվականին:
