Իրանի հեռուստատեսությունը վերջերս ցուցադրել է «Որսորդը թակարդում» փաստագրական ֆիլմը, որը պատմում է Իրանի հատուկ ծառայությունների կողմից Կենտրոնական հետախուզական վարչության (ԿՀՎ) լրտեսների հայտնաբերման մասին: Այս մասին հաղորդում է ադրբեջանական Trend գործակալությունը:
Ֆիլմում մի մարդ, որն իրեն կոչում է Մեթյու Վալուկ, նկարագրում է, թե ինչպես է իրականացվել ԿՀՎ-ի գործողությունը:
Նրա խոսքերով՝ 2008թ. ինքը կայք է ստեղծել, որտեղ կեղծ աշխատանքի տեղեր են առաջարկվել Սլովենիայում գիտության, բիոտեխնոլոգիայի, տեղեկատվական տեխնոլոգիաների և այլ ոլորտներում: Այն բանից հետո, երբ մի քանի իրանցիներ հետաքրքրվել են առաջարկով, նրանց անունները և այլ անձնական տվյալներ իբրև թե փոխանցվել են ԿՀՎ-ին:
Ֆիլմում վեց մարդ ներկայացված են որպես Իրանում ԿՀՎ-ի գաղտնի գործակալներ:
2011թ. իրանական ԶԼՄ-երը հաղորդել էին, որ Թեհրանում ձերբակալվել է ԿՀՎ-ի 12 գործակալ:
