Հայ ազգային կոնգրեսի քաղխորհրդի երեկվա նիստին սպասվում էր, որ քննարկման է դրվելու ՀԱԿ անդամ «Ժողովրդավարական հայրենիք» կուսակցության` ՀԱԿ «առողջացման» առաջարկ փաթեթը և ՀԱԿ համակարգող Լևոն Զուրաբյանին փոխելու առաջարկը, սակայն «Ժողովրդավարական հայրենիքե կուսակցության նախագահ Պետրոս Մակեյանը չներկայացավ Կոնգրեսի քաղխորհրդի նիստին: Երեկ այդ և այլ հարցերի շուրջ «Առաջին լրատվական»-ը զրուցեց Պետրոս Մակեյանի հետ:
– Պարոն Մակեյան, մամուլում արդեն կարծիք կա, որ Դուք խուսափել եք ներկայանալ ՀԱԿ քաղխորհրդի երեկվա նիստին, քանի որ Ձեր իսկ կուսակցությունում կոնսենսուս չկա, և այն ավելի շատ ղեկավարվում է Լևոն Զուրաբյանի, քան Ձեր կողմից, նաև, որ Դուք արդեն հրաժարվել եք ՀԱԿ-ը բարեփոխելու ծրագրից:
– Ինձ իմացող մարդը երբեք նման հարց չէր տա: Էդ բանսարկու բաներին, խառնակիչ նյութերին ես ոչ մի մեկնաբանություն չեմ տալիս: Միայն մի բան ասեմ, որ մեր կուսակցությունում ընդունված փաստաթղթերն անցել են միաձայն, քաղխորհրդի անդամները բոլորը կողմ են քվեարկել, բացակայել են 4 հոգի քաղխորհրդի անդամներից, որոնցից երկուսը ղեկավարվում են Լևոն Զուրաբյանի կողմից:
– Ովքե՞ր են, եթե գաղտնիք չէ ղեկավարվում Լևոն Զուրաբյանի կողմից:
– Ղուկաս Մեհրաբյանն ու Պետրոս Գևորգյանը: Նրանք իրոք ղեկավարվում են Լևոն Զուրաբյանի կողմից, ինչը բավարար չեղավ կուսակցությունը վերցնելու համար:
– Իսկ ինչպե՞ս կբացատրեք, որ Դուք երեկ չմասնակցեցիք քաղխորհրդի նիստին:
– Հա, բայց ՀԱԿ-ում երեկ հարց չէին քննարկում, ՀԱԿ-ը քննարկելու օրակարգ չունի` ընտրություններին չի մասնակցում, իմաստը որն է: Ես մինչև մեր նախագիծը չհամաձայնեցնեմ մյուս կուսակցությունների հետ, էնտեղ անելիք չունեմ, գնամ որ ի՞նչ, ժամավաճառությա՞մբ զբաղվեմ: Բայց երեկվա իմ բացակայությունը հարգելի է եղել: Ես թաղման եմ մասնակցել, 4-ին նոր ազատվել եմ: Ընդ որում` Զուրաբյան Լևոնն էլ է սկզբի պահին էնտեղ եղել: Մեր կուսակցության քաղխորհրդի որոշումը մենք դեռ պետք է ներկայացնենք մեր գործընկեր կուսակցություններին, բանակցենք նրանց հետ, այնուհետև ներկայացնենք ՀԱԿ: Դա կտևի մի երկու շաբաթ: Էնտեղ մթնոլորտը ես լավ գիտեմ: Նախապես ուզում ենք մարդկանց հետ խոսել, հասկանալ տրամադրությունները, նոր ներկայացնել:
– Ի վերջո, իշխանափոխության խնդիր ՀԱԿ-ում դնո՞ւմ եք:
– Մենք դրել ենք ՀԱԿ-ի առողջացման, բարեփոխման, քաղաքական դաշտ վերադարձնելու, քաղաքական գործոն դարձնելու խնդիրը: Մնացածը դա մուտիլովկեք են, խառնակչություն է, որի մեջ մենք չկանք:
– Տեղեկություն կար, որ երեկ ՀԱԿ քաղխորհրդի նիստում դրվելու էր Լևոն Զուրաբյանի հրաժարականի պահանջը:
– Մեր առաջարկությունը անձերի հետ կապված չէ: Ավելի շատ խնդիրը դրված է այս ճգնաժամային ասեմ, քաոսային ասեմ, անկառավարելի վիճակից բերել նոր վիճակի, որ Կոնգրեսը դառնա քաղաքական գործոն: Երևի շատ բարդ բան եմ ասում, բայց մեր ուզածն էդ է: Մենք ուզում ենք նախ մեր փաստաթուղթը քննարկել ՀԱԿ մեր գործընկերների հետ, նոր հետո փոխանցել քաղխորհրդի քննարկմանը: Դրա համար երեկ չէինք կարող դա ներկայացնել և քննարկել: Այսօրվանից քննարկումներ ենք սկսում ՀԱԿ-ի մեր գործընկեր քաղաքական միավորների հետ: 10-12 քաղաքական միավոր է մնացել ՀԱԿ-ում, հերթականությամբ կփորձենք ժամանակի մեջ տեղավորվենք: Միգուցե իրենց կողմից էլ առաջարկություններ կլինեն: Այդ ֆորմատով ենք աշխատելու:
– Պարոն Մակեյան, արդեն իսկ ՀԱԿ-ից որոշակի արձագանքներ կան ՀԱԿ-ի ճգնաժամի ու ՀԱԿ-ի երիտասարդների առթիվ Ձեր հայտարարությունների հետ կապված, ասում են ճգնաժամը ձեզ մոտ է…
– …Եթե մի քաղաքական ուժ, որը երկու տարի առաջ հարյուր հազարավոր միտինգ էր անում ու պարտադրում էր իշխանությանն իր ուզածը, իսկ այսօր 7 տոկոսի շեմը հազիվ հաղթահարել է ու նախագահական ընտրությանը դիտորդի կարգավիճակով է, էդ ճգնաժամ չի՞: Ուրիշ ի՞նչ պետք է լինի, որ ճգնաժամ լինի: Նախ պետք է այսօրվա իրավիճակը ճիշտ գնահատվի, թե ինչու հասանք էս վիճակին:
– Ի՞նչ արդյունք եք ակնկալում ՀԱԿ կուսակցությունների հետ առանձին հանդիպումներից:
– Չեմ կարող ասել, դա կախված կլինի իրենց տեսակետներից:
– Ի վերջո, կարծում եք, Ձեր առաջարկն ինչ-որ բան կարո՞ղ է փոխել ՀԱԿ-ում:
– Եթե մենք չգնանք այդ փոփոխությանը, և ՀԱԿ-ը դա անտեսի, իրավիճակը ճիշտ չգնահատի, մոտ ժամանակներս ՀԱԿ-ը ոչ միայն որպես գործոն, որն այլևս գոյություն չունի դժբախտաբար, այլև լոգոն էլ չի լինի:
– Իսկ Դուք Լևոն Զուրաբյանի հրաժարականը պահանջո՞ւմ եք, թե՞ ոչ:
– Թույլ տվեք դեռ որևէ բան չգաղտնազերծել:
– Պատրաստվո՞ւմ եք Լևոն Տեր-Պետրոսյանի հետ առանձին քննարկել Ձեր առաջարկները:
– Խնդիր չունեմ ես: Իհարկե, կցանկանայի, եթե ինքը կամենա, որովհետև դա իմ որոշելու խնդիրը չի:
– Իրեն առաջարկե՞լ եք նման բան:
– Ես ժամանակին՝ ԱԺ ընտրություններից հետո, մայիսի 19-ին նամակ եմ գրել Լևոն Տեր-Պետրոսյանին և իմ ու կուսակցության մտահոգություններն եմ արտահայտել մի քանի հարցերի շուրջ, բայց, ցավոք սրտի, եղել է բանավոր պարզաբանում Կոնգրեսի աշխատակիցների կողմից:
