Anonymous ցանցահենային խմբավորումը հարձակվել է Մեքսիկայի պաշտպանության նախարարության ինտերնետ-կայքի վրա ու «որոշակի տեղեկություն» գողացել: Այս մասին հայտնել են ցանցահենները՝ Twitter սոցցանցի էլեկտրոնային էջերից մեկում հրապարակված հաղորդագրության մեջ:
Հարձակման հետևանքով Մեքսիկայի պաշտպանության նախարարության կայքը մեկ ժամ անհասանելի է եղել, ներկայում ևս այն թերություններ ունի` փոխանցում է ITAR-TASS-ը:
Վեբ-կայքի վրա հարձակումից հետո Anonymous-ը լատինաամերիկյան երկրի կառավարությանը քննադատող ուղերձ է թողել` հավելելով, որ շուտով կհրապարակի ձեռք բերած ամբողջ տեղեկությունը:
Մեքսիկայի պաշտպանության նախարարության ներկայացուցիչներն առայժմ զերծ են մնացել մեկնաբանությունից: ITAR-TASS-ի թղթակցին նախարարությունից ասել են. «Ներկայումս ֆունկցիոները տեղում չէ, որն իրավասու է պատասխանել մամուլի հարցերին»:
Twitter-ում թողած հաղորդագրության մեջ Anonymous-ը զգուշացրել է, որ մտադիր է շարունակել հարձակումները Մեքսիկայի կառավարության պաշտոնական կայքերի վրա: Մասնավորապես, խմբավորումը պատրաստվում է հասնել ՆԳՆ և ռազմածովային նավատորմի կայքերին:
Anonymous խմբավորումը ճանաչվել է 2010-ին, երբ խմբի անդամները մի շարք հարձակումներ էին գործում այն ընկերությունների և կազմակերպությունների կայքերի վրա, որոնք խոչընդոտում էին WikiLeaks-ի գործունեությանը:
Anonymous-ը հիմնականում քաղաքական նպատակներ է հետապնդում՝ հանդես գալով հօգուտ տեղեկատվության տարածման ազատության և համացանցում խոսքի ազատության:
