Առնվազն 800 մարդ է զոհվել Կոտ դ’Իվուարի արևմտյան Դյուկուե քաղաքի համար ընդդիմության և նախագահի պաշտոնն ապօրինի զբաղեցնող Գբագբոյի կողմնակիցների միջև մարտերի ժամանակ: Այս մասին հաղորդում է France Presse գործակալությունը` հղում կատարելով Կարմիր խաչի միջազգային կոմիտեի տվյալներին:
Ըստ այդ կազմակերպության ներկայացուցիչների` հիմնական մարտերը տեղի էին ունեցել երեքշաբթի օրը: ՄԱԿ-ի ներկայացուցչությունն աֆրիկյան այդ երկրում հայտարարել է, որ պատրաստ է Լորան Գբագբոյին օգնություն ցուցաբերել, եթե վերջինս հրաժարվի իր ընտրված նախագահ` ընդդիմության ներկայացուցիչ Ալասանա Ուատտարայի հետ հակամարտությունից: Այս մասին հաղորդում է BBC-ն: Երեկ նաև հայտնի է դարձել, որ Ուատտարայի հետ է հանդիպել Ֆրանսիայի նախագահ Նիկոլա Սարկոզին` դրանով աջակցություն հայտնելով Կոտ դ’Իվուարի ընտրված նախագահին, որին հաջողվել է երեկվա դրությամբ վերահսկողություն հաստատել այդ երկրի 80%-ի վրա:
Հիշեցնենք, որ անցած տարի նոյեմբերին Կոտ դ’Իվուարում տեղի ունեցան նախագահական ընտրություններ, որից հետո երկու թեկնածուներն էլ հայտարարեցին իրենց հաղթանակի մասին: Միջազգային կազմակերպությունները, շատ երկրներ` Աֆրիկայում և Արևմուտքում, լեգիտիմ ընտրված նախագահ ճանաչեցին ընդդիմադիր Ուատտարային, սակայն Գբագբոն հրաժարվեց թողնել իր պաշտոնը, իսկ երկիրը թևակոխեց անկայունության երկարատև փուլ:
